Paga bien la pena andar pela web del fotógrafu alemán Bernhard Lang, nacíu en 1970 en Crailsheim, pal sur del país xermanu. Vive en Munich dende 1993 y, d’ellí, muévese pel mundu pa retratar dende l’aire la destrucción de la natura por cuenta de les intervenciones (industriales, mineres, agrícoles, turístiques, etc.) de la humanidá.
Lo que choca del trabayu de Lang ye la guapura de les semeyes que ye quién a facer dende avionetes y helicópteros. Estes series de vistes aérees empezó faceles allá pel 2010 y sobrevoló países como Alemaña, Italia, Holanda, Les Filipines o Estaos Uníos. Nel añu 2016 fixo tamién una serie de semeyes de mines d’África pero usando como ferramienta la vista dende un satélite.
La blancura de les semeyes de les mines de mármol de Carrara (les mayores de mundu d’esti mineral) contrasten coles barres de colorinos que faen los riegos de plantes de tulipán floríes de les llaneres d’Holanda. Los azules brillantes –de les más o menos redondes– plataformes dedicaes a la aquicultura de les costes de Grecia apeguen bien colos segmentos de llinia hermanos, de colores ferruñosos, mariellos y azulaos de los contenedores marítimos de los puertos d’Alemaña.
España y los sos mares de plásticu, consecuencia de l’agricultura intensivo tapao con invernaderos, tamién ta presente na obra de Lang. Almería ye la mayor mancha de plásticu del planeta Tierra.
Leave a Reply