Los votos del xuráu técnicu dieron el trunfu al dúu mallorquín JANSKY na edición más recién de Suns Europe, el festival de llingües minorizaes que cada añu se celebra na ciudá friulana d’Udine. Nel fallu, el xuráu destacó «la orixinalidá del grupu y la so habilidá pa combinar poesía y innovación». Según informa la organización, la actuación del grupu tresformó’l sábadu 1 d’avientu’l Teatro Nuovo Giovanni d’Udine nun club gracies a los ritmos electrónicos mecíos cola flauta de Jaume y la voz de Laia, los dos componentes d’esti dúu que s’espresa en catalán.
El premiu del xuráu foi pa Martina Iori, representante de la comunidá de llingua ladina del valle de Fassa, al norte d’Italia. Iori recibió’l premiu de les manes de Pietro Fontanini, alcalde d’Udine, que destacó l’éxitu del festival Suns Europe, un acontecimientu que, cada añu, atrái más xente a la ciudá y que tien como oxetivu promover la creación cultural –non solo musical, sinón tamién lliteraria y cinematográfica– en llingües minorizaes. Nesti sen, el director de cine vascu Asier Altuna recibió’l Premiu Especial del festival pola so carrera de 25 años na realización de películes y otres producciones audiovisuales, pente les que «cuenta histories de la cultura vasca con fuercia, maña y orixinalidá».
Nesta ocasión, participaron nel festival nueve bandes, ente les que taben los friulanos Luna e un Quarto; Dario Hess, procedente del cantón suizu de los Grisones; Laura Hoo, de la minoría sueca de Finlandia, o Melissa Meewise, de la Baxa Saxonia. Polo que toca a la representación de la península Ibérica, a los ganadores hubo que sumar el grupu gallegu Espiño y la banda vasca Rodeo. Toos ellos fixeron posible, en palabres de Leo Virgili, director del festival, un «espectáculu fantásticu, con un nivel d’execución musical increíble». Virgili destacó tamién que tolos participantes demostraron «un entendimientu perfectu del espíritu de Suns Europe, que consiste n’establecer rellaciones, promover los intercambios y compartir idees».
Suns Europe ye un proyectu de la Cooperativa d’Información Friulana, col patrociniu d’ARLeF (Axencia Rexonal pola Llingua Friulana), la Rexón Autónoma Friuli Venezia Giulia, el Conceyu d’Udine, la Fundación Friuli y l’Institutu Vascu Etxepare, en collaboración cola Cooperativa Puntozero y otres organizaciones locales y internacionales, ente les que se cuenta’l Conseyu d’Europa y la Rede pa la Promoción de la Diversidá Llingüística. Un añu más, Suns Europe valió pa demostrar cómo la música ye un llinguaxe común que val pa que persones de procedencies estremaes puedan comunicase y compartir el deséu d’espresase caún na so llingua materna d’una manera moderna, innovadora y atractiva.
Leave a Reply