‘Kokoro’, una trabayu d’ilustración de la dibuxanta china QU Lan

QU Lan nació y crióse na China y, depués de graduase na Academia d’Arte, cambió pa vivir pa Francia. Trabaya como ilustradora y diseñadora pa ella, y collabora con editoriales, revistes y axencies de diseñu de tol mundu. Espón obres de cuando en vez y llevó premios polos dibuxos que diseña lo mesmo en Francia que na China. Como se pue ver na páxina web d’esta dibuxanta, QU Lan tien bien d’obres publicaes pero, de toes, destaca’l trabayu gráficu de la novelina Kokoro. L’usu bien elegante de los colores y les testures dan a esti trabayu munchu impactu ensin tener les saturaciones de colorinos típiques qu’usen la mayoría de les ediciones pa rapacinos o pa rapazonos.

Delphine Roux, l’autora del testu de Kokoro, ye una escritora francesa de lliteratura pa guaḥes y mocinos que tien muncha pasión polo asiático. La escritura d’ella ye como la comida xaponesa, paez mui facilina y con pocos ingredientes pero depués resulta mui sabrosa. Kokoro cuenta la historia de dos hermanos que queden güerfanos con doce y con quince años porque los padres muerren nun incendiu. Como ye de suponer, a los dos-yos queda’l corazón xeláu. Pero tienen que siguir medrando.