El domingu 16 d’ochobre del 2016 foi una xornada histórica p’Asturies y la cultura asturiana. La villa de Grau vio, esti día, cientos de persones lluciendo arguyoses el paxellu asturianu nuna xornada festiva —el Día’l traxe’l país— que naz con vocación d’asentase dientro de les celebraciones anuales del Conceyu de Grau. Amás, a les 12:30 hores empezaba, na Plaza los Dolores, el concursu Indumentaria 2016, onde compitieron 40 participantes por ver quién llevaba’l meyor traxe en caúna de les dos categoríes del certame (home y muyer) en mediu d’una espectación mui grande.
El xuráu —formáu polos espertos na etnografía y la indumentaria tradicional Constantino Menéndez, Consuelu Riu, Fe Santoveña y Ana Villanueva— distinguió col primer premiu (dotáu con 200 euros en cada categoría y unes lligues esclusives) a Laura Menéndez Fernandez y Javier Bengoechea Álvarez; col premiu segundu (dotáu con 150 euros), a Marina Caso del Torno y a Miguel Ángel Alonso Guerra, y col premiu terceru (dotáu con 100 euros), a Maribel Fernández González y Jonathan Martínez Fuente.
Sicasí, lo más importante de la xornada nun foi la competición, sinón la convivencia ente toles persones que pasaron per Grau tanto a llucir como a almirar la variedá de traxes tradicionales que se pudieron ver pela villa. Hubo paxellos de toles zones xeográfiques d’Asturies (d’oriente, del centru y d’occidente, del interior y de la marina) y de tolos estilos y usos sociales: de gala, de trabayu, de xente rico y de xente humilde. Lo que toos ellos teníen en común yera la calidá na confección y el procuru por siguir los modelos que se conocen de cómo yera’l traxe’l país na segunda metá del sieglu XIX.
Nel éxitu d’esta convivencia festiva tuvo muncho que ver tamién la presencia de la música y el baille tradicionales. Asina, el desfile arrancó cola interpretación, al cargu de Xosé Antón Fernández ‘Ambás’, acompañáu al violín por Dolfu Fernández, d’una danza onde se diben mentando les pieces del traxe’l país. Enantes d’esto, Ramsés Ilesies tocó xunto a Ambás una pieza a la pandereta y entrambos los dos conducieron, al acabar el concursu, la danza que s’entamó na plaza La Panerina. Amás, a lo llargo de tol desfile, poniendo banda sonora a les presentaciones de Raquel Vega y Alberto Suárez, pudo sentise la música del violín de Dolfu Fernández y l’acordión diatónicu d’Octavio Trapiello. Nel apartáu musical nun podía faltar tampoco la gaita y el tambor, qu’interpretaron de manera maxistral Arsenio González y Manolo Díaz. A los sones d’ellos arrancaron a echar unos bailles unes cuantes pareyes xusto enantes de conocese’l veredictu del xuráu.
Tanto’l Día’l traxe’l país como’l concursu Indumentaria surdieron de la iniciativa de la empresa de diseñu y xestión cultural B. Alto, a la que se sumaron na organización el Conceyu de Grau —representáu nel certame pola conceyala de Festeyos, Elsa Suárez— y la Caja Rural d’Asturies —nel nome de la entidá, entregó los premios el director de la sucursal de Grau, José Manuel Álvarez—. Tanto Elsa Suárez como’l representante de Caja Rural espresaron la so satisfacción por cómo se desenvolviera la xornada, hasta’l puntu de que la conceyala de Festeyos aseguró, na so intervención énte’l públicu, que quedaben toos emplazaos pa vese l’añu entrante pa celebrar, otra vez, el Día’l traxe’l país.
Darréu, pue vese una galería d’imáxenes de los participantes nel concursu y dellos miembros de la organización. Los retratos, d’una calidá estética pergrande, son del estudiu Ojos de Hojalata.
Leave a Reply