HENRIQUE G. FACURIELLA
Asistir a una representación de la compañía Higiénico Papel ye garantía de disfrutar el tiempu qu’ún tea sentáu na sala. El trabayu cuidáu del grupu que dirixe Laura Iglesia fai que’l públicu se meta del too na historia que-y tán contando y escaeza los problemes y les preocupaciones que lu esperen fuera del teatru, y esto foi lo que pasó’l vienres 22 de payares, nel Teatru Filarmónica, na representación de la pieza Una casa, cola qu’Higiénico Papel participa nel III Festival «Nel Amaro» de Teatru profesional en llingua asturiana y gallego-asturianu.
Una y bona s’iguaron los problemes col soníu del principiu, el cuasi monólogu de Carlos Dávila representando al rapacín Andrés –convertíu dacuando nun diálogu cola voz n’off de la madre o del güelu– foi rodando ensin torgues al mesmu tiempu que’l públicu diba entrando nos cuartos de la casa grande au esi mesmu Andrés vive cola familia –la má, el pá, les hermanes ximielgues Clara y Marta, güelito Lluís y el perru Cocu–. La casa de muñeques armada en mediu del escenariu y los xuegos de lluces qu’indicaben en qué parte taba desenvolviéndose l’acción que diba contando Andrés creaben la ilusión de tar viendo unos dibuxos animaos alemanes o suecos, como aquellos que, nos primeros años 90, echaben pela televisión.
Igual que lo cenciello de los dibuxos –cuasi artesanales, como los muñequinos que, dientro de la casa, representaben a los miembros de la familia d’Andrés– daba a aquellos programes infantiles un carácter más poéticu que narrativu, la simplicidá y la guapura del planteamientu que fixo Higiénico Papel enganchaben al espectador y facíenlu volver a una edá en la que too yera muncho más grande pero, al mesmu tiempu, más cenciello, y los problemes y mieos duraben lo qu’entardaba n’entrar pela puerta un miembru queríu de la familia.
En cuantes a les cuestiones llingüístiques, la versión asturiana de Xuan Costales destaca pol procuru nel usu del asturianu, al mandase d’un rexistru que, conservando tol rigor, pueda entender ensin problema cualquier persona que s’avere a la pieza. Nesti sen, namás pasé pena por que, pudiendo usar una palabra tan guapa y tan común como «cañicón», s’optara pola voz «columpiu».
En resumíes cuentes, Una casa ye una obra, como toles que llevo visto d’Higiénico Papel, que disfruten tanto los neños como los grandes gracies al cuidáu que la compañía pon en tolos detalles, dende’l llinguaxe qu’usa a la escenografía –con detalles mui prestosos, como’l xubir y baxar de la lluna– y la iluminación o’l soníu. Una historia cola que los rapacinos van pasalo bien y los mayores pueden olvidar, por un momentu, tantes coses que faen de la vida un sitiu poco afayadizu y entrar nuna casa onde apetez muncho vivir.
Una Casa
Higiénico Papel Teatro
Teatru Filarmónica, Uviéu
22 de payares del 2019
Dirección y dramaturxa: Laura Iglesia.
Traducción al asturianu: Xuan Costales.
N’escenariu: Carlos Dávila.
Música y espaciu sonoru: Javier Blanco.
Melodía añadida: Dolfo Camilo Díaz.
Escenografía y atrezzo: Josune Cañas.
Ayudante d’escenografía: Rodolfo Antolín.
Dibuxos: Cristina Cillero.
Diseñu d’illuminación: Carlos Dávila.
Fotografía: Roberto Tolín.
Diseñu gráficu: Lous & Martín.
Videu promocional: Sr. Paraguas.
Leave a Reply