El Nationalmuseum d’Estocolmo estrena pa esta seronda la esposición Breathing Color (Respirando color) de l’artista y diseñadora industrial de los Paises Baxos Hella Jongerius (1963). Una instalación pa ver que presenta los resultaos d’una investigación d’ella sobre’l color, la forma, la lluz y los materiales na qu’echó bien de tiempu.
L’arte y el diseñu son configuraciones de color, lluz, forma, sombres, rellumos y materialidá. La esposición de Hella Jongerius ta llevantada nel puru finsu que separa l’arte y el diseñu. Lo que presenta ye un esame visual de cómo’l color y la lluz interactúen y cambien según la hora del día. Con formes de papel, testiles, cerámica, metal y plásticos, la diseñadora de fama internacional (foi directora d’arte de colores y materiales en Vitra munchos años), enseña l’oficiu que ganó a base de los munchos años que lleva peleando cola investigación artística del color, la lluz y la materia. Como diseñadora, ella, a veces, desdiz les opiniones ensin fundamentu de los fabricantes de coses de diseñu y l’usu del color nel desarrollu de productos que faen. Jongerius argumenta qu’eso que nos lleva a perder aspectos y esperiencies del mundu que tenemos alredor. El fin de la esposición ye ofrecer la oportunidá de pensar y discutir sobre esti tema.
La esposición va montase en collaboración col Muséu del Diseñu de Londres, y yá se pudo ver primero nesa ciudá inglesa y nel Muséu Boijmans Van Beuningen de Roterdam.
Breathing Color (Respirando color)
Hella Jongerius
Nationalmuseum, Estocolmo
Del 17 d’ochobre del 2019 al 1 de marzu del 2020
Leave a Reply