L’equipu de La Marca del Este, ún de los grupos de creación de xuegos de rol más activos del Estáu, volvió facelo anguaño: el 9 de payares consiguieron los 9.000 euros que necesitaben pa editar Hardboiled, un xuegu de xéneru negro inspiráu nos clásicos de la novela policiaca, criminal y detectivesca, como’l Sherlock Holmes d’Arthur Conan Doyle o’l Poirot d’Agatha Christie, pasando pel Auguste Dupin d’Edgar A. Poe, el Maigret de Georges Simenon, el Padre Brown de Chesterton o’l Ripley de Patricia Highsmith. Ello ensin refugar a los protagonistes del sub-xéneru hard-boiled, que da títulu al xuegu y que se caracteriza por una presencia mayor d’escenes violentes y erótiques que na novela negra clásica.
Pero los xugadores de Hardboiled van poder encarnar nes sos aventures personaxes procedentes de tolos estilos y tendencies del xéneru negro, dende la novela negra escandinava –con autores como Camilla Läckberg, Stieg Larsson o Henning Mankell– hasta la novela d’espíes a lo John le Carré o Ludlum, pasando pelos escritores españoles de más calidá dientro del xéneru, como Manuel Vázquez Montalbán y el so Pepe Carvalho, Lorenzo Silva, Alicia Giménez Bartlett, Alexis Ravelo, Cristina Fallarás, Andreu Martín o Francisco González Ledesma.
Ello ye muestra de la versatilidá que permite Hardboiled, onde los xugadores van poder ambientar les histories nel país que quieran y hasta en cualquier dómina histórica, amás d’axustar los casos a la corriente lliteraria que meyor vaya colos sos gustos: novela detectivesca clásica a lo Agatha Christie, el thriller políticu, la intriga criminal, la ficción de misteriu, les conspiraciones mundiales o l’espionaxe internacional. Too ello tien entrada nes partíes con Hardboiled, la única llende ye la imaxinación de les persones que participen.
Na parte más artística, el llibru onde se materializa’l xuegu va contar con una cantidá grandísima d’ilustraciones orixinales, que lleven la firma del dibuxante Borja Pindado. Ente les ilustraciones, atópense les 25 clases o arquetipos de personaxes disponibles nel xuegu —más otros ocho personaxes descritos y equipaos pa usar darréu nes aventures—, una colección d’armes bien surtida —con exemplares históricos como la Colt Detective o la Glisenti 1910, ensin escaecer rifles, ametralladoras y subfusiles— y un capítulu d’equipu con preseos de lo más estremao, qu’añaden fondura y detalle al xuegu.
La maquetación de Hardboiled ye obra del diseñador Francisco Solier, que yá trabayó en proyectos anteriores de La Marca del Este, como Walküre, ente otros xuegos de rol editaos n’España. Esta maqueta va ponese, en feches próximes, a disposición de tolos usuarios, pos el xuegu —sacante les ilustraciones— va editase con llicencia Creative Commons, de manera que cualquier persona pueda ampliar, cambiar y reconstruir el xuegu según-y pete, creando conteníu con llibertá total, hasta con fines comerciales.
Leave a Reply