Gerardo Bustillo Rodríguez (Sagua la Grande, Cuba, 1870 – Somió, Xixón, 1919) empezó l’afición a la fotografía hacia 1890. Yera oficial de l’Armada y en 1892 embarca na corbeta Nautilus pa dar la vuelta al mundu, y d’esi viaxe escribe un diariu personal que documenta con semeyes. Va ser na primer década del sieglu XX cuando’l trabayu fotográficu d’él empiece a tener reconocimientu n’España, ameritando dellos premios n’esposiciones nacionales y una publicación d’obra de contino en revistes especializaes, onde defende una fotografía artística de pleno na llinia del pictorialismu –movientu que se dió dende finales deñ sieglu XIX y hasta la primer guerra mundial que reivindicaba la fotografía como arte–, gastando un procesu técnicu percuriau y siendo fiel a los cánones estéticos d’aquel movimientu.
N’Asturies, la labor d’él ye fundamental pa entender la valoración de les semeyes como arte, más allá del valor y la función documental que tienen. Bustillo foi quién a axuntar a los aficionaos y profesionales nel Foto Club Asturianu (1906), del que foi fundador y primer presidente, y impulsó en 1909 la Esposición de Fotografía que se fixo en Xixón, sacando alantre la primer muestra de calter nacional celebrada n’Asturies que tuvo un éxitu descomanáu y que valió pa proyectar la obra de los nuestros fotógrafos meyores. Gerardo Bustillo Rodríguez tenía una personalidá abierta y inquieta, y na última etapa interesóse tamién pola cinematografía.
La esposición Gerardo Bustillo. Pola fotografía, pol arte (1895-1919), que pue vese hasta finales de xineru de 2018 nel Muséu del Pueblu d’Asturies, enseña unes doscientes semeyes (positivaes en papel), diapositives, autocromos y semeyes estereostópiques d’esti fotógrafu aficionáu asturianu tan importante como desconocíu. Nesta muestra, el Muséu del Pueblu d’Asturies empezó a trabayar va pa seis años contactando colos nietos del autor, que movilizaron a tola familia p’axuntar los fondos que se muestren. Na temática de les obres hai vida urbana y portuaria de Xixón y d’otros sitios, retratos y composiciones y escenes doméstiques y familiares.
Gerardo Bustillo. Pola fotografía, pol arte (1895-1919)
Muséu del Pueblu d’Asturies, Xixón.
Del 19 d’abril del 2017 al 31 de xineru del 2018
Exposición fotográfica y audiovisual 3D
Leave a Reply