ALBERTO SUÁREZ
Vila Real de Santo António, ciudá llevantada na frontera ente Portugal y España –onde desemboca’l ríu Guadiana–, mandóla facer nel sieglu XVIII el Marqués de Pombal, primer ministru del rei José I. La villa trazóse con cais en cuadrícula, igual que se fixo cola reconstrucción de la Baixa de Lisboa depués del terremotu y maremotu de 1755.
El Marqués de Pombal foi un dictador y exerció’l poder como tolos dictadores, de manera absoluta y ensin duelu. L’asentamientu decidiólu col empeñu de pelear pola pesca col país vecín pero les coses nun-y salieron como contaba, tolo contrario, porque los marineros d’esa parte, que vivíen nel pueblín de Monte Gordo, nun quixeron habitar la villa nueva. El Marqués mandó quema-yos les cases y ellos desterráronse pa lo qu’agora ye Ayamonte y Isla Cristina.
Hasta que los dos países entraron na Comunidá Europea, Vila Real foi una ciudá comercial de frontera, comunicada per barcos col país vecín y, dando vuelta a tola ría, per carretera. Vila Real nunca llegó a ser un puertu pesqueru grande y tovía anguaño les casines de planta o planta y pisu que mandó facer el Marqués tán ocupaes con tiendes y restauranes pal turismu, mayormente español.
Pero Vila Real ye muncho más que rodiellos y bacaláu. Fáense mercaos de productos agroalimentarios algarvíos y tamién d’artesanía y, cada segundu sábadu de mes, tien un rastru d’antigüedaes mui curiosu onde aperios, cacía y adornos de tiempos espléndidos asoléyense ente les casines blanques y igualadines que mandare facer el Marqués más poderosu y ruin de la historia portuguesa.
En tiempos de globalización comercial, del imperiu Inditex y de los bazares de los chinos, nuna dómina onde toles ciudaes ufierten lo mesmo nes zones de tiendes, un rastru cuidáu ye un disfrute pa la vista. Y una gran oportunidá de reciclar y revalorizar lo qu’otros nun quieren yá.
Leave a Reply