Cerquina, el discu que sacó esti 2017 el grupu Felpeyu trai once cortes, siete cantaos –con toles lletres de Ruma Barbero nun siendo una, que-yos la fixo Boni Pérez– y cuatro instrumentales, que percuerren tolos ritmos tradicionales del país: marcha, cantar de ronda, xota, muñeira, xirandilla, saltón, araña, alborada, música coral popular, pasucái, etc. mecíos con composiciones y igües orixinales de Felepeyu. Anguaño, nesta formación tan veterana –fai venticinco años–, tán Ruma Barbero (vañu), Senén Fernández (baxu, voz principal y coros), Elías García (buzuki), Diego Pangua (gaita y flauta), Lisardo Prieto (vigulín) y Moisés Suárez (guitarra y coros). Pa Cerquina, tamién collaboraron Xuan Nel Expósitu (acordión) y Richard García (teclaos). La grabación fíxose nos Estudios 15:40 y la mestura y la masterización, en Tutu Estudiu. La producción ye del propiu grupu y ye mui fina en tolos aspectos. Les semeyes promocionales y del discu fíxoles Xurde A. Cachero y el diseñu gráficu foi por cuenta de Ruma Barbero.
Cerquina ye ún de los meyores discos de folk asturianu en bien d’años. Un trabayu al altor de lo meyor del folk que se fixo nel país, creau y interpretáu por músicos fechos, con muches tables y cualidaes, n’estáu de gracia, p’axustar unes composiciones d’una guapura sinfónica grandísima. En Cerquina nun s’echa en falta nada nin tampoco de más, ye un discu equilibráu, con un posu serenu y brillante, y lleva a la música tradicional asturiana a un nivel mui altu, a una pureza de soníu espléndida –llama l’atención esta pureza nos temes de gaita–. Cerquina ye un discu elegante y de muncha categoría.
Nel discu más recién de Felpeyu tienen quiciás menos presencia los instrumentos de vientu y más los de cuerda, y despliega un ramu de pieces cantaes, enllenes de reflexón política, económica, social y identitaria. Los felpeyos fixéronse unos paisanos y yá tienen ganáu’l derechu hasta de dedicase un cantar, «Carretera», onde se fai repasu a la vida d’estos músicos, lluchadores por demás, a los que, de les llárimes d’Altube hasta les rises del Beleño, siempre-yos prestó volver pel camín más llargu pa casa. El cantar «Ferreirín», qu’escribió Boni Pérez, ye una ayalga que fala del despoblamientu de los pueblos y aldees d’Asturies, y tien un estribillu —«Quién pudiera tar güei de vuelta / no país de las casas abiertas»— con una lletra guapa y triste, y con una melodía fresca y allegre, que, na voz preciosa de Senén Fernández, conviértese n’himnu. Nesti discu de Felpeyu les lletres non van tanto pel palu de la comedia y la folixa como pela reflexón posada sobre una tierra, Asturies, qu’acaba. Y nesta estaya ye mui d’emponderar el trabayu de lletrista de Ruma Barbero, con pieces d’una guapura poética esplédida como «A la mar». Nel penúltimu cantar de Cerquina, los felpeyos pónense coñones, como ye vezu nes composiciones d’ellos n’otros discos, y echen fuera «Préstame dir», una alegoría al trabayu difícil de dir a cortexar una moza cuando nun te quieren los de casa, y igual hasta nin ella. La historia d’un desengañu.
Ye una bonísima noticia pal país y pal panorama creativu musical asturianu esti sestu discu de Fepeyu, esta vuelta a la escena –depués de nueve años ensin grabar– pa poner estes composiciones de luxu nel mercáu dificilísimu de la música. Y vuelven a lo grande, con un cedé estucháu en cartonín y con una edición en vinilo pela primer vez na historia del grupu. Pa esta producción, Felpeyu buscó y ganó’l sofitu de munchos mecenes nuna plataforma de xestión d’esti tipo d’acciones de financiación colectiva ente particulares. Los siguidores de Felpeyu respondieron y el grupu nun defraudó, sacando un discazu de primera.
Cerquina
Felpeyu
Tierra Discos
CD/LP
Leave a Reply