L’estudiu de diseñu TRÜF ye una empresa especializada en marques pero tamién fai munches más coses. Fundáronlu nel 2006 Adam Goldberg y Monika Kehrer que son bien espertos nel asuntu de la publicidá y la imaxe porque lleven munchos años nel sector, trabayando n’axencies de Nueva York y de Los Ánxeles, onde tán agora. Son unos diseñadores que van a lo práctico y que trabayen dientro d’otros equipos si fai falta pa desarrollar estratexes de comunicación.
Ellos son de los que diseñen, esperimenten, descubren y peleen bien con tolos detalles hasta consiguir la finura que quieren pal trabayu d’ellos y pa los veceros que tienen. Dicen que, como profesionales, nun son pa cualquiera y que-yos gusta trabayar colos meyores. Diseñen marques elegantes y contemporánees onde enseñen lo perfechos que son colos detalles.
Faüna ye un proyectu d’ilustración d’animales qu’usa namás dos colores (colorao y prieto) y los elementos y trazos llevaos a lo mínimo posible. La guapura del resultáu salta a la vista. De momentu acaben de compartir parte del trabayu, pa que se conoza, y van siguir con ello. Faüna ye una bona disculpa pa mirar otros trabayos d’esta pareya de profesionales del diseñu.
Leave a Reply