El Muséu Evaristo Valle, de Xixón, tien colgada –hasta finales del mes d‘avientu– la esposición titulada Estrada. Pintures y relieves, qu‘atropa 24 obres recientes d‘Adolfo Estrada (Buenos Aires, 1942), un artista principal del arte concretu n‘España y qu’anda cerca nes creaciones del Hard edge, un movimientu de pintura abstractu qu‘empezó en Califonia pelos años sesenta.
Na obra d‘Estrada, l‘arquitectura tien muncha influencia, seguramente por ser fíu d‘arquitectu. Lo que siempre lu fascinó esta disciplina llevólu a collaborar con profesionales d‘esta rama en dellos proyectos y él mesmu reconoz que los conocimientos que tien d‘arquitectura tán presentes na estética constructivista de lo qu‘él pinta. «La mio pintura y la mio escultura ye construcción», opina.
Les obres d‘Estrada destaquen pol volume que naz de les formes y del tratamientu del color. Les creaciones d‘él lleven tiempu y tamién munches capes de pintura d‘oleu que, depués de seco, rasca hasta que nun queden referencies de la materia nin del pincel, namás pigmentu ralu que fai volume gracies a la testura. Na gama de colores, lo prieto enfréntase a lo blanco y a los colores primarios o pasteles, n‘estayes bien estremaes ensin mezclase nunca. El resultáu d‘esti trabayu paciente son unes composiciones atractives, serenes, que llamen a pensar nel espaciu y la manera como lu acotamos. Abstracción pura sin referencies simbóliques a la realidá.
Estrada lleva n‘España dende 1959, trabayando y viviendo nel Empordà, nuna casa que diseñó él lisa y lasa. Namás que colo xusto, ensin ringorrangos que lu distraigan, dedícase a facer obres reducíes a rayes, cuadraos, triángulos. Xeometría y abtracción de formes simples pero con fondura poética. Esti pintor lleva yá munches esposiciones n‘Europa y América del Sur y obres d‘él formen parte de la colección del Muséu Nacional Centru d‘Arte Reina Sofía.
Estrada
Muséu Evaristo Valle (Xixón)
Hasta’l 23 d’avientu
Leave a Reply