Macarena Álvarez Marcos lleva dende pequeña lloca pol mundo de la moda. Nel añu 2013 fixo’l sueñu d’ella realidá y convirtióse en diseñadora. Al poco yá s’especializó en sombreros y tocaos d’alta costura que diseña y fai ella a mano. L’artesanía, los diseños únicos y la calidá del acabáu ye la señal que distingue los trabayos d’Emea –que ye la firma y nome del taller-tienda que la diseñadora tien abiertu n’Uviéu–.
La manera de trabayar d’esta artesana asturiana ye munches veces por encargu porque s’adapta a los gustos y necesidaes de les veceres. Les creaciones d’ella (sombrerería pa neños y pa mayores, tocaos grandes y pequeños, diademes, pameles, chisteres, etc.) aporten elegancia y distinción lo mesmo pa diario que pa celebraciones especiales y solemnes.
Amás de sombreros, tocaos y complementos esclusivos, Emea tamién trabaya’l diseñu de bolsos y calzao o clásicos o más creativos. Los trabayos d’esta diseñadora –que ye mui nueva– tienen en munchos casos la categoría d’obra d’arte.
Leave a Reply