Nespoon ye de Varsovia, Polonia. Fai obras artístiques que tán ente lo que ye arte urbanu de paredón, la cerámica, la pintura, la escultura y les ayalgues. L’afán que tien ye trabayar pa xenerar nos demás emociones positives. A veces, la temática de les obres d’él tira más pa cuestiones sociales y polítiques que-y paecen importantes. Munches de les obres d’él son estampaos con motivos tradicionales, fechos de barro o pintaos nes paredes. ¿Por qué-y presten eses formes? Porque son un códigu estéticu que sal de lo más fondo de la cultura popular. En cada bordáu o encaxe pue topase simetría, dalgún tipu d’orde y harmonía, valores que toos buscamos de manera natural. ¿Y porque los pinta nes muries? Por que-y da llibertá.
En Belorado, na Castiella burgalesa, el colectivu independiente StARTer proyectos Culturales, de la mano d’Estela Rojo y l’artista Regue Fernández, convidó a Nespoon a participar nun proyectu pa tratar la presencia de les muyeres nos espacios públicos. Nesa zona de Belorado (igual que pasa en delles fasteres d’Asturies), les muyeres tiren los bolos en partíes onde namás xueguen elles. Esta iniciativa tenía como fin recuperar esa tradición y dala a valir. A comuña, los dos artistes pintaron les fachaes de la Plaza san Nicolás. Esi yera’l sitiu onde les muyeres armaben la bolera. Regue pintó les muyeres y Nespoon, l’encaxe típicu de la indumentaria d’ellí.
Cuando s’estrenó la decoración nueva, hubo una xuntanza con alegría y rises. Igual dalguna de les muyeres de les semeyes de les que copiaron pa pintar les muries yeren les paisanines vieyines que fueron a mirar. El casu ye que los bolos volvieron a ponese y les muyeres volvieron a tirar.
Leave a Reply