La quinta edición del Fèstin, Festival d’Artes Escéniques Samartín –que se va desenvolver nel conceyu de Samartín del Rei Aurelio ente’l xueves 6 y el domingu 9 de xunu–, trai una programación centrada nos espectáculos de cai y pa tolos públicos, con montaxes d’humor, maxa, danza contemporánea y clown.
El festival –que dirixe l’actor, director y autor teatral Borja Roces– va arrancar el xueves 6 de xunu a les 18 hores n’El Bodegón Espaciu Taller, asitiáu nel númberu 54 de l’Avenida Principáu d’Asturies de Blimea, col espectáculu Al circu, al cargu de Tras la Puerta Títeres. Esti montaxe, dirixíu a neñes y neños de 0 a 3 años, ye un mecigayu de cuentos, xuegos, cantares y marionetes destináu a despertar la imaxinación de los más pequeños. Al tar l’aforu acotáu, ye necesario inscribise previamente na dirección d’e-mail festinescena@gmail.com.
El vienres 7, l’actividá va treslladase a Sotrondio, concretamente a la plaza y redolada de la ilesia, onde Adrián Conde, magu y clown, va desenvolver l’espectáculu El gran Braulio, una retafila de númberos de maxa qu’asoceden cuasi de casualidá. En casu de llover, l’actividá va facese nel Aula Cultural La Plaza.
El Parque de La Llaguna, en L’Entregu, va ser el tercer escenariu d’esti Fèstin. El sábadu 8, de 17 a 19 hores, el grupu Kamante Teatro va facer nel quioscu de la música seis pases del espectáculu El Tornasol, un trabayu enllenu de la maxa que despierten les barraques de feria d’antaño. Nel mesmu parque, el Grupu de Teatru Los Pintores va montar una caxa máxica onde, per un furacu, va poder vese un espectáculu circense de cinco minutos nel que’l color y la música son los protagonistes.
A les 19:30 hores, na plaza de la ilesia de L’Entregu, la compañía Proyecto Piloto y Rebeca Tassis van invadir l’espaciu públicu cola pieza de danza contemporánea Play again, basada na esperiencia de xugar a los videoxuegos arcade. Nel mesmu espaciu, a les 20:30 hores, Ana Serna y Lauren Atanes van interpretar la pieza Ella era yo, una obra que pon el focu enriba de la violencia de xéneru. Si llueve, entrambos los dos espectáculos van llevase a la sala d’esposiciones del Teatru Municipal de Samartín.
El domingu 9, el festival vuelve a Blimea, concretamente a la plaza de la ilesa, onde, a les 12, Pablo Picallo va demostrar, col so espectáculu Biciclown que montar en bicicleta nun ye, dacuando, tan fácil como dicen. De llover, l’actividá va facese nel salón d’actos del Centru Social de Blimea.
El mesmu domingu, a les 20 hores, va empezar, nel Teatru Municipal de Samartín, en L’Entregu, l’únicu trabayu de sala d’esta edición: l’espectáculu Aire, de Producciones Nun Tris. Esti montaxe, finalista l’añu pasáu del II Festival «Nel Amaro» de Teatru Profesional en llingua asturiana, centra la mirada nel baille tradicional asturianu pero con un puntu de vista más contemporáneu pa contar el procesu d’esvanecimientu y olvidu que carez la cultura del país. N’acabando la pieza, va entregase a la mesma compañía Nun Tris, una de les más veteranes de la escena asturiana, el V Premiu Fèstin.
A lo llargo d’estos cinco años, el Fèstin presentó al públicu de Samartín espectáculos que xueguen con llinguaxes y narratives nuevos y, gracies al enfotu del so director, Borja Roces, pudieron vese pela primer vez n’Asturies montaxes como Teatro Invisible, de Matarile Teatro; Mi gran Obra, de David Espinosa; PaseDoble, d’Artes Verbénicas; Las Princesas del Pacífico, de La Estampida Teatro, o’l documental Angélica, una tragedia, de Manuel Fernández-Valdés.
Leave a Reply