El Teatru Filarmónica d’Uviéu va acoyer, los cuatro primeros vienres de payares, les representaciones de les obres finalistes del II Premiu de Teatru Profesional Nel Amaro en llingua asturiana o gallego-asturiano. Les funciones van empezar el día 2 de payares, cola representación de la obra Aire, de Producciones Nun Tris, y detrás d’ella tán programaes les pieces Hansel y Gretel, d’Higiénico Papel Teatro (9 de payares); Garráime, que lu mato o la lloca hestoria d’Asturies, d’Escenapache (16 de payares), y Disculpe, caballeru, de Zig Zag Danza (23 de payares). El xuráu encargáu d’escoyer la obra ganadora –y formáu por especialistes en teatru y llingua asturiana– va asistir a les representaciones de los montaxes finalistes.
Al premiu, dotáu con 6000 euros, pudieron presentase obres yá estrenaes tanto orixinales como versiones o adaptaciones de títulos n’otres llingües. Esti gallardón tien l’envís de facer por enriquecer y prestixar l’asturianu y el gallego-asturianu nel ámbitu del árte dramáticu, y lleva’l nome de Nel Amaro, l’autor turonés fallecíu nel 2011 y que, a finales de la década de los setenta del sieglu XX, abrió’l camín a la vanguardia teatral n’asturianu. Na edición anterior resultó ganadora la obra Llázaro de Tormes, de Carlos Alba Cellero, una adaptación del clásicu castellanu La vida de Lazarillo de Tormes y de sus fortunas y adversidades.
En cuantes a les pieces finalistes anguaño, Aire, de producciones Nun Tris, recrea un escenariu pos-catástrofe pero deriváu d’una situación de perda y olvidu. El testu arranca de temes más o menos comunes na poesía y la lliteratura asturianes de güei –como la derrota, la idea de país, de casa o de patria– y, dende’l caos, muévese hacia la creación d’una realidá nueva afitada nes parees esbarrumbaes de la estinción. Nun Tris, fundada como compañía profesional en 1997, caracterízase pola so capacidá d’adaptación a públicos y formatos mui estremaos, una versatilidá que se ve bien nos más de 50 montaxes de tou tipu que lleven armaos dende’l so nacimientu y que van del teatru de calle al teatru clásicu pasando pela ópera, el drama, el teatru-danza o los espectáculos infantiles.
El Hansel y Gretel d’Higiénico Papel Teatro trata de tres primos que vuelven alcontrase nel desván de la casa los güelos. Ente los peluches vieyos y un montón de trastos rotos, atopen los llibros que’l güelu-yos lleía cuando yeren pequeños, ente los que’l so favoritu yera Hansel y Gretel. A pesar de los años que pasaron dende entós, los tres alcuérdense perfectamente de la historia y, al lleela otra vez, van disfrutar como si tovía fueren aquellos neños. La compañía Higiénico Papel Teatro tien al llombu venti años d’esperiencia y más de trenta espectáculos producíos. El so sellu personal ye la elegancia nel tratamientu de los temes pero onde nun falten toques d’humor, provocación y poesía.
Escenapache presenta la propuesta más cómica del festival: Garráime, que lu mato o la lloca hestoria d’Asturies, onde desenvuelven, en clave d’humor, dellos episodios de la historia asturiana: dende la Prehistoria –col Homo prexubilatus como antecedente remotu de los asturianos– a un hipotéticu futuru –una escursión de xubilaos al centru Niemeyer nel 2061 qu’inclúi una aparición de la Santina– pasando pela invasión de los godos, la batalla de Cuadonga, el desembarcu de Carlos V, la Revolución del 34 y la época de la Transición. L’espectáculu va na llinia del espíritu de la compañía que dirixe Marga Llano y que cuenta ente les sos producciones con pieces de cabaré, testos contemporáneos o costumbrismu punk.
La obra que zarra’l cartel ye Disculpe, caballeru, onde la compañía Zig Zag Danza plantea’l dilema ente la realidá y la ilusión valiéndose de los personaxes que creara Miguel de Cervantes n’El Quixote. Asina, enseñen cómo tanto la realidá como la ilusión garren forma na cabeza de caún y condicionen la visión que cada persona tien del mundu que lu arrodia. Zig Zag Danza nació nel añu 2000 como un proyectu independiente de la so directora, Estrella García. Depués de poner n’escena quince producciones propies, la compañía convirtióse nuna estructura firme, capaz d’abordar trabayos d’estilos y dimensiones mui estremaes pero siempre fieles a los principios de busca de formes nueves d’interpretar y traducir llinguaxes escénicos.
El 23 de payares sabráse cuál d’estos cuatro montaxes sucede a Llázaro de Tormes, de Carlos Alba Cellero, nel palmarés del Premiu de Teatru Profesional Nel Amaro.
Leave a Reply