Moa Hunter ye una marca de miel de manuka puro que se saca d’una casería de más de dos mil díes de gües, la Waikene Station, y que furrula como una casería de carbono. L’amu ye Greg Summerton y los antepasaos d’él, maorís, usaron aquella tierra como un pasu seguru de la costa oeste pa la este na isla del sur de Nueva Zelanda. Los moa yeren unes aves –que nun yeren quién a volar– propies de Nueva Zelanda de tamañu descomanáu (calcúlase que midíen más de tres metros d’alto y que pesaben más de doscientos kilos) que yá s’estinguieron, y que sirvieron de comida principal de los primeros humanos que poblaron les isles, los llamaos polos historiadores Moa Hunters.
La manuka ye un matu que tamién puede llegar a arbolín grande. El nome ye una voz maorí y los colonos ingleses tamién lu llamaron árbol del té porque coles fueyes facíen un fervinchu que-yos valía como si fuere té, pero nun ye. La miel de manuka púnxose mui de moda va poco y hubo quien llegó a pagar hasta trescientos euros por un kilu. Los nutrientes d’esta miel son como los de les demás aunque ye fácil oir falar d’ello como un «superalimentu», conceptu en sí yá publicitariu puru. Lo que ta estudiao ye qu’esta miel ye buena enforma pa curar mancadures de la piel, quemadures, etc.
En Wakenese Station hai cueves que tienen pintaos y grabaos dibuxos antiguos fechos polos antepasaos de Greg. La casería agora ta dedicada pa los árboles autóctonos y hai miles de manuka preciosos. De lo que trabayen les abeyes nos caxellos sácase la miel de manuka puro que Summerton quixo poner en mercáu con una marca de calidá nueva y de muchu postín (Moa Hunter). Un trabayu de diseñu gráficu mui finu ayuda a contar la historia del productu y los oríxenes de les tierres onde nacen les florines rosina de la manuka.
Cada caxa u s’empaqueta esta miel ta fecha a mano y lleva aceite de manuka, de manera que l’arume de los arbolinos ta presente namás abrir el paquete. Greg y los de casa d’él ciarren cada tarru de miel con un cordelín texíu a mano y depués ponen un sellu de cera col logu de Moa Hunter. Miel de luxu con un packaging de primera. El trabayu fírmenlu el diseñador gráficu y creativu publicitariu Paul Russell, de Nueva Zelanda, y la firma Kallan&Co que trabaya en Finlandia y, pa la parte del pacíficu del sur, de la mano de Sarah Russell.
Leave a Reply