El director Héctor Menéndez presenta’l videuclip del tema «La Lienda», del grupu folk D’Urria

Héctor Menéndez ta acabante presentar el videuclip del tema «La Lienda», del grupu D’Urria, una composición que ta publicada nel discu primeru d’ellos En ca Pla, editáu por Goxe en marzu de 2018. D’Urria ye un dúu de músicos folk, l’asturianu Moises Álvarez y el ḷḷacianiegu José Manuel Sabugo –que ye’l compositor del tema «La Lienda»–. Sabugo foi primero del grupu Tsuniegu y agora tamién toca con Piértigu, y Moises Álvarez ye componente de Felpeyu. Collaboraron nesta pieza na grabación del videuclip Luis Senen Fernández, Lluci G. Palomares, Pepín de Muñalén y Montse Otero.

El títulu del discu, En ca Pla, ye un homenaxe de Sabugo a la casa de so güela Plácida, onde se crió de neñu. Tolos cantares del discu tan cantaos na variante llingüística del asturllionés occidental. Acurdión y cuerdes valen pa dar ritmu a pieces de creación propia y a otres que son reellaboraciones de pieces tradicionales de Ḷḷaciana. Nesti trabayu hai collaboraciones de músicos de muncha talla, como les de Luis Senén Fernández (batería, baxu, bombu, caxón), Lluci G. Palomares (panderu cuadráu, pandereta y voz n’«Ima»), Ruma Barbero (vañu); Pepín de Muñalén (flautes); Rubén Bada (vigulín); Xuan Nel Expósito (acordión diatónicu); Velu Muñiz (gaites); Richard García (teclaos); Ambás (voz en «Vitor»); Auro Pazos (voz en «Vegaviechos»); Vero González (voz en «La campanona») y Montse Otero (voz en  «La Lienda»).

La dirección del videuclip –una pieza cinematográfica de munchu calidá– ye del asturianu Héctor Menéndez. El videu cuenta la lleenda de tres soldaos republicanos asturianos que, depués de cayer Madrid, escapen de la capital vistíos de civiles pa Viḷḷablino col plan de cruzar Ḷḷeitariegos y pasar p’Asturies. Collaboraron nesti audiovisual l’Ayuntamientu de Grau, El Muséu del Pueblu d’Asturies, El Frente del Nalón y la Fundación del Muséu Vascu del Ferrocarril.

Héctor Menéndez ye un realizador mui mozu que yá tien fechos otros trabayos audiovisuales sobre la Guerra Civil y dellos otros de ficción. A pesar de llevar pocu tiempu dirixendo, yá llevó dellos premios en festivales.