El xuráu del premiu Alfonso Iglesias de Cómic n’asturianu decidió, por unanimidá, conceder esti gallardón a la obra Indianu, del artista plásticu y fotógrafu Luis Navazo. El xuráu reconoció nel trabayu’l méritu de la temática, qu’«avera a una época poco tratada nel cómic asturianu, la de la emigración y l’empiezu de los movimientos obreros de finales del sieglu XIX y primeros del XX».
Los miembros del xuráu emponderaron tamién el tratamientu gráficu de la historia, «que bebe d’un estilu clásicu al mesmu tiempu qu’ufre composiciones de páxina y recursos estilísticos más actuales», según se pue lleer nel acta.
Fernando Padilla, director xeneral de Planificación Llingüística y Normalización foi l’encargáu de presidir la sesión y, xunto a él, tuvieron l’encargu d’evaluar los trabayos el músicu y diseñador gráficu Ruma Barbero –ganador de la edición anterior del concursu–; la editora María Concepción Prieto, y el xefe del serviciu de Planificación Llingüística y Normalización, José Antonio García, qu’actuó como secretariu.
A esti premiu podíen presentase cómics d’estilu, tratamientu y tema llibres, escritos en llingua asturiana y con una estensión mínima de cincuenta páxines, siempre que tuvieren inéditos y ensin premiar n’otros concursos. Pa participar yera abondo con presentar un proyectu inicial con una estensión mínima de quince páxines.
Luis Navazo (1976), tituláu n’Artes Plástiques y Fotografía Artística na Escuela d’Arte d’Uviéu, trabayó de fotógrafu en diarios como El Comercio o El Diario de Menorca y foi operador de cámara na RTPA enantes d’empezar una etapa nueva al frente de Zatopek Studio.
Leave a Reply