Nudes, un estudiu d’arquitectos fundáu en Mumbai (La India) por Nuru Karim, son los diseñadores del café Cardboard de la ciudá que tamién se conoz en mundu enteru como Bombai. Pa concienciar a la xente sobre lo importante que ye reciclar y usar materiales que nun acaben cola naturaleza, decidieron usar cartones pa too (menos pa les tuberíes).
Nesti café con platos pa xintar veganos y llibres de gluten, les parés, les llámpares, la barra, la mesa y les sielles son de cartón ondulao de color castañu. Nel terrén de la hostelería, lo fundamental d’un café-restaurán ye la comida y el tratu que dan pero tamién hai que dase cuenta de la importancia que tien el diseñu y la comodidá. Una de les baces que tien el cartón, por exemplu, ye qu’amortigua’l ruíu y fai más agradable la vida social. El Café Cardboard ye un exemplu bien bonu de creatividá y de compromisu con una vida nes metrópolis que nun acabe col planeta.
Nos años vinientes vamos a ver munches más coses de papel y munches menos de plásticu. El cartón ye un material que vien recicláu y que pue volver reciclase hasta cinco veces. Una plancha de cartón lleva un 50% del volume que ye aire. Y, enceráu nes zones onde tea espuestu a la humedá, aguanta bien.
Leave a Reply