Diálogu ente arqueoloxía y producción industrial nun homenaxe artísticu a San Claudio

El miércoles 22 de payares inauguróse, nel Muséu Arqueolóxicu d’Asturies, la esposición San Claudio. In memoriam. 1901-2009. Una reflexón artística alredor del pasáu industrial, onde dieciocho artistes –la mayoría nacíos o residentes n’Asturies– reflexonen sobre’l procesu de degradación qu’afecta, desque zarró, a la fábrica de lloza de San Claudio, asitiada na parroquia uvieína de San Cloyo. La muestra, qu’organiza’l Gobiernu d’Asturies, va tar abierta hasta’l 18 de febreru del 2018.

La esposición ocupa dellos espacios dientro del muséu uvieín, ente los que destaquen la sala d’esposiciones y la sala anexa, el patiu que da a la sala capitular de la catedral, la escalera principal y, sobre manera, el claustru del que fuera monesteriu de San Vicente, que val de marcu pa les instalaciones de Federico Granell, Ermesto Junco y Benjamín Menéndez. En cuantes al tipu d’obres, la variedá ye mui grande, dende la fotografía al grabáu pasando pel dibuxu, la pintura y delles instalaciones con materiales estremaos, ente los qu’abonda, como nun podía ser d’otra manera, la cerámica.

El montaxe de la esposición, responsabilidá del artista y galerista Pedro García –del que procede tamién la idea orixinal–, ta fechu con un cuidáu esquisitu y aprovecha de la meyor manera les posibilidaes distintes qu’ufren los espacios del muséu. Asina, na sala d’esposiciones, la sensación ye d’una llimpieza y claridá ablucantes a pesar de contener catorce obres d’ocho artistes distintos y dos d’elles –la instalación de Daniela Zanzoni y Purificación Trabanco y la del propiu Pedro García– ocupar un área importante nel suelu de la sala. Amás, la vista de la muria de San Vicente al traviés de la cristalera del fondu aporta una sensación de sitiu arqueolóxicu, de diálogu col entornu, que ye otru de los puntos fuertes d’esta muestra. Asina, el que la esposición se faiga nel muséu arqueolóxicu tien tol sentíu, al tratase, la propia fábrica, d’una instalación en procesu de convertise, ella mesma, nun sitiu arqueolóxicu si nun se fai dalgo qu’apare’l deterioru.

Nesti sen, hai que destacar la obra colectiva d’Agustín Bayón, Rinaldo Álvarez y Pedro García, instalada nel patiu que mira pal recintu de la catedral y la Corrada l’Obispu, onde se distribúin, albentestate, cuasi mil platos de lloza bizcochao de San Claudio. Según vaya avanzando la esposición, los tres artistes van dir cambiando los platos blancos por otros con yerba semao nellos hasta componer un dibuxu que nun va tar acabáu más que pa cuando haya que desmontar la obra. Esta pieza pue interpretase, amás, como un resume conceptual de tola esposición, onde se reflexona sobre la producción industrial y el trabayu en serie y cómo’l pasu del tiempu, l’abandonu, la deformación progresiva y la intervención de la naturaleza van ocupando y recuperando’l sitiu pasu ente pasu.

La fábrica de lloza

La casa industrial uviedina, fundada nel añu 1901, tuvo muncha sonadía pola calidá de la lloza blanco que producía y les sos estampaciones, tan guapes, lo que fixo que la cacía asturiana se vendiere non solo n’España, sinón tamién nel estranxeru. Sicasí, y depués de dellos intentos de protexer los edificios y los bienes culturales que guardaba –ente los qu’hai que citar los moldes de les sos pieces más famoses–, la vieya factoría ta cuasi desmantelada. Con too y con ello, el sitiu nun perdió’l so interés como motor de xeneración d’arte, como se pue ver na serie de propuestes plástiques espuestes nel vieyu monesteriu benedictín.

A lo llargo d’estos años, nun fueron pocos los artistes que s’averaron a la fábrica allugada en San Cloyo a la busca d’inspiración pal so trabayu. Y non solo asturianos, sinón tamién dellos estranxeros, qu’aporten una visión mui interesante del procesu d’abandonu y descomposición. Ye’l casu, por exemplu, de la suiza Catherine Grangier, qu’usa los platos de San Claudio pa tresmitir les sos esmoliciones sobre la feminidá y la intimidá al traviés de los actos y los oxetos de tolos díes –y qué cosa más cotidiana que los platos onde se come–. El californianu Nicholas F. Callaway, pela so parte, céntrase nos moldes que valíen pa facer les pieces y, especialmente, nes firmes de los sos autores, nuna rellación mui interesante ente’l procesu de producción industrial –aparentemente impersonal y en serie– y l’elementu humanu, que non solo ye mano d’obra, sinón tamién orixe del patrimoniu material y intelectual de la fábrica.

Esto enllaza con otru de los propósitos d’esta esposición, tal como esplicó’l so comisariu, Juan Carlos Aparicio Vega, que nun ye otru que valir d’homenaxe a los y les trabayadores que, a lo llargo de más d’un sieglu, aportaron la so valía profesional a la hora de facer una lloza a l’altura de lo meyor d’Europa y que, munchos d’ellos, tán viendo cómo tou aquel esfuerciu cómenlu agora los artos y písalu xente qu’entra namás qu’a estrozar. Por esti motivu, una de les pieces que más llama l’atención tanto pola so calidá estética como pol conceptu que tresmite ye la de Noemi Iglesias, una artista mui moza qu’anguaño ta trabayando, precisamente, nuna fábrica de porzolana en China. Esti conocimientu y una sensibilidá ablucante espéyense na so instalación/escultura, onde cubre, con vendes d’escayola, delles pieces de lloza de San Claudio, no que quier ser un procesu de curación d’un espaciu qu’agora ta mancáu.

En cuantes a los artistes qu’integren la esposición, la mayoría son nomes que nun participen nesti tipu d’iniciatives y que, como señala Pedro García, «paez que nun existen a nivel d’instituciones». Esti fechu, en cuenta de dir en contra de la calidá del conxuntu, lo que fai ye tolo contrario, al ufrir visiones nueves que van más p’allá d’una «reivindicación fácil de San Claudio», apunta García, pa proponer la fábrica de lloza como motivu inspirador d’una muestra «d’un valor artísticu altu y una potencia comunicativa mui grande». Esta ye, amás, una obra coral, onde los nomes de Daniela Zanzoni, Purificación Trabanco, Mónica de Juan, Nicholas F. Callaway, Noemi Iglesias, Pedro García, Verónica García Ardura, Amaya Granell, Liana Montserrat, Agustín Bayón, Laura Rodríguez, Catherine Grangier, Rinaldo Álvarez, Teo Hernando, Federico Granell, Emanuel Reyes, Ernesto Junco y Benjamín Menéndez xúntense a los de Juan Carlos Aparicio Vega, Daniel Franco y Patricia Cayón nel trabayu de comisariáu, ellaboración del catálogu –previstu pal mes de xineru– y diseñu gráficu, respectivamente.