Delirios de ye la primer novela de Jose Iglesias (Asturies, 1986) pero que naide s’engañe, ye una novela que ta perbién escrita. Y, amás, engancha. Personaxes naturales y mui bien definíos tiren del filu del misteriu a mui bon pasu hasta’l final. Delirios de ye una novela onde la intriga comparte protagonismu col erotismu, los secretos de l’amistá y, sobremanera, los d’una familia. Con estes blimes, el cestu resultante ye una obra bien resuelta na que’l protagonista –que lleva tola vida pel mundu– vuelve al sitiu onde nació y acaba enterándose de quién ye y de lo que ye capaz de facer.
Dellos crímenes que nun tienen esplicación empiecen a flotar alredor de la vida de Rico. Recuerdos dolorosos, mieos, perdes repentines y fatalidaes argayen enriba d’él. Manexando los compases con maestría, diendo y viniendo nel tiempu narrativu, el relatu d’Iglesias engarza una cadena d’acontecimientos qu’amarren al protagonista –un rapaz que tien más preguntes que respuestes– al pasáu, de la que lu van lliberando pal futuru.
Delirios de llevó’l premiu Asturies Xoven de narrativa del 2017. Jose Iglesias ye guionista y analista de guión y eso nótase muncho pa bien na composición de l’acción, na descripción de los personaxes y na perfección de los diálogos. La novela ye en castellanu.
Delirios de
Jose Iglesias
Impronta, 2018