Decero Creativo ye un espaciu de creación artística, onde artistes y enamoraos del arte desendolquen procesos diferentes, talleres y esposiciones que tienen que ver col fechu de crear en disciplines como’l grabáu, la pintura, la xilografía, el collage, la cerámica o la lliteratura. Los talleres tán abiertos a tolos públicos y hai programes pa neños y p’adultos a tolos niveles –dende los que tán empezando hasta los artistes fechos–. Decero ta tamién presente en feries d’arte y promueve la creación cultural y la participación popular nos procesos artísticos. Los maestros son siempre profesionales con munchísima esperiencia.
Decero Creativo ye una apuesta de l’artista Marta Fermín, –que yá fixo los tres años–, y que tamién promueve la venta d’obres gráfiques (n’otros puntos de la ciudá d’Uviéu, amás de nes instalaciones propies) orixinales y úniques. La primer colección van firmala cuatro muyeres: Belán Álvarez, Susana Villanueva, Cecilia Antolín y Marta Fermín. Tamién tienen entamao a editar llibros d’artista.
Amás, hasta’l 10 de payares tienen colingada la esposición L’ECLÈCTIC del Grupo B.Y.E. (Borja Moreno y Esteban Ferrer), de Valencia. Una muestra con pintura mural y xilografíes que lleva al públicu al mundu del cómic y que tien referencies historiques al mundu de la imaxe.
Decero Creativos
Martínez Vigil (Cuesta La Noceda) 8, baxu
Uviéu
Leave a Reply