Cuadernos d’Ítaca

ALBERTO SUÁREZ
Cualquier viaxe al esterior, llonxe de casa, tien tamién la so correspondencia nun viaxe interior, un viaxe que calibra les nuestres percepciones de lo propio y de lo ayeno, el tamañu y dimensión real de les coses, la consistencia de les nuestres convicciones, la valía de les nuestres maneres de ser y de tar. Conocer otros países, vivir nellos, intimar con estranxeros que pasen a ser los nuestros vecinos, amigos y conocíos tien como consecuencia inevitable la comparanza. Lo que ún ye y lo que podía ser, lo que ye’l so país y lo que podía ser. Lo que somos, fuímos y quixéremos ser. Nuna situación asina, con tola fuercia de la ilusión, la señaldá y el desencantu batiéndose dientro de nós dase una confrontación vital que nos posiciona d’una manera inevitable y qu’acaba brotando fuera de nós, porque necesitamos dicir ónde tamos, quién somos y cúala ye la nuestra esperiencia. Queremos, necesitamos decilo, pa que valga pa los demás y pa que nos valga a nós mesmos.

 

Lo que fai Alfonso Zapico nestes diez histories de los sos Cuadernos d’Ítaca, ye precisamente eso. Contar les sos esperiencies y reflexones como emigrante asturianu forciáu, como mozu con ideales políticos, como depositariu de la memoria del so tiempu y d’otros tiempos pasaos. Zapico cuéntanos con una franqueza grandísima’l so dolor de tener nacío y vivío nuna tierra que nun tien oportunidaes pa él, y failo d’una manera serena, amable, constructiva, pero llamando a les coses pel nome. Y failo al traviés de la comparanza, de narrar cachinos de vida, de vides diferentes, d’histories pequeñes n’estensión y grandes en significáu. Y llevanta la so voz, que ye la voz d’una xeneración entera  –nacida y formada n’Asturies, bien cualificada y obligada a emigrar– que tien muncho que dicir a una sociedá inmovilista y caduca.

Ítaca brindóte tan guapu viaxe.
Ensin ella nun emprendieres el camín.
Pero nun tien yá na que date.

Aunque la topes probe, Ítaca nun t’engañó.
Asina, sabiu como volvieste, con tanta esperiencia,
vas entender yá qué signifiquen les Ítaques.

(Cavafis, fragmentu del poema «Ítaca»)

 

Alfonso Zapico algamó colos Cuadernos d’Ítaca el Premiu Alfonso Iglesias de Cómic, qu’entama’l Gobiernu d’Asturies. L’illustrador blimeín yá ganara nel añu 2012 el Premiu Nacional de Cómic, que concede’l Ministeriu de Cultura d’España, cola obra Dublinés. Zapico vive dende’l 2008 n’Angulema, en Francia. Tituláu na Escuela d’Arte d’Uviéu, trabaya como profesional gráficu nes estayes d’illustración y animación tanto editorial como publicitaria.

 

Cuadernos d’Ítaca
Alfonso Zapico
Trabe, 2014
94 páxines