La ciudá de Covilhã asítiase na fastera sureste de la Serra da Estrela, nel distritu portugués de Castelo Branco. Tradicionalmente, l’actividá económica principal de la ciudá y el conceyu foi la industria de tresformación de la llana, una actividá qu’empezó hai más d’ochocientos años y que fixo de Covilhã ún de los centros principales de producción de texíos de llana d’Europa.
Inspiraos nesta realidá industrial, que definió’l desarrollu social y urbanu de Covilhã, la empresa Formas Efémeras –en collaboración col Conceyu de Covilhã y col apoyu económicu de la Dirección Xeneral de les Artes del Gobiernu portugués– entamó nel añu 2011 WOOL, el Festival d’Arte Urbanu de Covilhã, una cita que se repitió nos años 2012, 2014 y 2015 y que, a poco y a poco, ta faciendo d’esta ciudá portuguesa un muséu al aire llibre.
Añu a añu, les muries de los edificios del cascu vieyu van poblándose de personaxes, animales y otres fantasíes salíes de les manes y el maxín de dellos de los artistes urbanos más importantes de Portugal y Europa. Asina, ún de los más llamativos ye Owl Eyes, del lisboeta Bordalo II, que creó un curuxu xigante —símbolu de la sabencia y la cultura— a partir de materiales sacaos de desguaces y hasta de la basura. Ye esti, amás, un llamáu a facer renacer los valores de la cultura nel centru históricu de Covilhã, una zona que cuerre’l riesgu de quedar despoblada por causa de la dificultá de caltener en condiciones habitables los edificios antiguos.
Precisamente, esti enfotu por revitalizar el centru históricu de la ciudá ye otru de los motivos que tan detrás de la organización de WOOL, de manera que la presencia d’artistes y obres contemporánees faigan de feramientes capaces de tresformar social, cultural, económica y urbanísticamente la comunidá. Nesti sen, el propiu nome del festival xuega con dos conceptos lligaos a estes realidaes: per una parte la llana —n’inglés, wool—, que dio fama nel pasáu a Covilhã, y per otra, l’arte muralísticu —la voz inglesa wall, muria, ye cuasi homófona de wool—, una disciplina de la que que los organizadores quieren facer a la ciudá un referente nacional.
Sicasí, l’actividá de WOOL estiéndese más p’allá de la Serra da Estrela y, depués de cinco años dende la primer edición, los organizadores tienen desenvuelto acciones paraleles n’otros sitios tanto de Portugal como d’Europa y África. Asina, Fundão, Coimbra, Abrantes, Figueira da Foz, Cascais, París o Djerba, en Túnez, foron yá escenariu de dellos eventos relacionaos col arte urbanu en cuantes qu’instrumentu de rehabilitación y valorización del texíu social y cultural.
Leave a Reply