Colunga celebra’l I Festival de Cerveza de Navidá

Ente los díes 2 y 4 d’avientu, la villa de Colunga celebra’l I Festival de Cerveza de Navidá, la única cita d’Asturies dedicada a esti tipu de cerveza, que se caracteriza pol sabor especiáu y una graduación alcohólico que pasa de los 6º y pue llegar a los 14º. La iniciativa d’esti festival nació del párrocu de San Cristóbal el Real, Gaspar Muñiz Álvarez, que contó cola collaboración de la Comisión de Fiestes de Loreto.

Esta feria sigue un modelu estendíu per Bélxica, Alemaña y otros países de centroeuropa, onde los mercaos d’artesanía rellacionao cola Navidá comparten espaciu con puestos onde les cerveceríes ufren ellaboraciones propies de la época invernal, munches d’elles venceyaes a los monesterios trapenses. Ye’l casu de la Chimay Grande Resérve, una de les que se van poder prebar en Colunga estos díes; ellaborada na abadía belga de Scourmont, ye una cerveza escura d’arume potente, fecha a partir de la variedá «Azul» pero avieyada en barriques de madera y con una tercer fermentación en botella, lo que favorez que gane en sabor según pasa’l tiempu.

Otra cerveza monástica que va tar a disposición del públicu que s’avere al parque de Colunga ye la Spencer Holiday Ale, una variedá inspirada nes cerveces belgues d’iviernu pero fecha al otru llau del Atlánticu, nel monesteriu trapense de St Joseph de Spencer, en Massachusetts. D’inspiración trapense pero ensin vinculación directa con nenguna abadía ye la St. Bernardus Christmas Ale, una cerveza potente, llicorosa —tien 10º d’alcohol– pero con tastu a carambelu, prunos y figos. Tampoco van faltar nomes clásicos d’estes feches, como la Bush Noël, la Gulden Draak 900 –avieyada en pipes de whisky escocés single malt–, la Kapittel Winter o la Samichlaus, que, pola so graduación alcohólica —pue llegar a los 15º— y el so sabor asemeyáu a la coñá, ye abondo más propia p’acompañar los postres que la cena.

Gastronomía típico

Precisamente l’apartáu gastronómicu nun va quedar de llau na cita colunguesa. Tanto les nueches de los díes 2 y 3 (vienres y sábadu) como a mediudía del 3 y el 4 d’avientu (sábadu y domingu), na carpa instalada nel parque de Colunga van sirvise platos típicos de la cocina belga y alemana, como son les salchiches o’l codiellu de gochu, too ello acompangao con chucrut —repollu fermentao— o llombarda. Tampoco van faltar les llambionaes típiques de les feches navidiegues, como los turrones, mazapanes o polvorones artesanos.

Capítulu aparte merecen los quesos, pos esti festival naz apadrináu pol Círculu Gastronómicu de los Quesos Asturianos, que foi l’encargáu de facer la escoyeta de les variedaes que se van sirvir estos díes. La clientela va poder escoyer la tabla de quesos asturianos —un quesu de Taramundi con nueces y ablanes, ún afumáu de Los Caserinos y otru d’esta mesma quesería de Villaviciosa de mezcla de vaca y cabra— o la de quesos holandeses —compuesta por tres tipos de gouda: ún con denominación d’orixe; otru al pesto rosso, con tomates secos, y un terceru al pesto verde, col so sabor característicu a albahaca.

Un quesu esclusivu: Donor Fakila

La importancia que la organización da al apartáu queseru del certame llevólos a diseñar, a comuña cola quesería Los Caserinos, un productu esclusivu pal festival: el quesu Donor Fakila, un quesu de vaca de pasta prensao que tuvo trenta díes somorguiáu en cerveza Chimay Gran Reserva y que se va poder mercar namás qu’estos tres díes, pos fíxose una tirada acotada a trenta unidaes. Esti productu, anque se pue consumir inmediatamente, los sos ellaboradores recomienden guardalu un tiempu y abrilu alredor del día de Navidá pa que desenvuelva tol sabor que-y da’l bañu en cerveza.

Esti quesu quier ser, amás, un homenaxe a la historia del conceyu de Colunga, pos fai referencia al llamáu Documentu de Fakilo, consideráu’l manuscritu orixinal más antiguu que se conserva del Reinu d’Asturies. Esti documentu recueye la donación qu’una muyer, de nome Fakilo, fixo, nel 803, al monesteriu de Santa María de Lliberdón. D’esta manera, les abadíes trapenses de Bélxica y la so tradición cervecera danse la mano colos monesterios de la Alta Edá Media astur pa ofrecer una esperiencia sensorial cásique relixosa.