Les semeyes que compartimos enseñen reproducciones de delles partes del cuerpu humanu –el corazón, los pulmones, la sesera y la columna– fechos en tres dimensiones y forraos y remataos con mapes de papel de la ciudad de Zurich, en Suiza. L’autora d’esti trabayu ye l’artista y ilustradora alemana Katrin Rodegast y fíxolos por encargu de la revista Globe, una publicación qu’edita la ETH Zurich (una universidá helvética especializada en ciencia, tecnoloxía, inxeniería y matemátiques).
Trátase d’un trabayu creativu mui finu y impactante onde les carreteres, cais, edificos y ríos son los protagonistes, ganando vida y relieve. Estes creaciones anatómiques nacieron pa promover un proyectu estrella: el «Zurich Heart», nel que tan metíos venti grupos d’investigación col oxetivu, a plazu llargu, de ser quieén a consiguir un corazón artifical que pueda tresplantase. De momentu, diez millones de persones n’Europa tienen un corazón que nun puede más. La llista d’espera de los tresplantes ye mui grande, y los enfermos esperen col corazón nun puñu. Dende les universidaes de Zurich decidieron movese y empezar a pensar no impensable. Y a fabricalo. De momentu, la camapaña de promoción yá ye pa robar el corazón y pa dar muncho que pensar. Como tien que ser.
Katrin Rodegast, que trabaya dende Berlín, llevó’l premiu «Talentu del Añu» d’ADC y el de Diseñu de Red Dot. La creación de pieces reales en cuenta de dixitales, con papel o cartulines, recortaes y con relieve son una tendencia cada vez más importante nel mundu de la creación gráfica publicitaria. Depués de tanta dixitalización nun podía volver más que lo físico y lo manual.
Leave a Reply