El mundu cambia y les maneres de rellacionase tamién. Pa una reunión de trabayu o pa una presentación o conferencia nun tenemos por qué tener dos niveles, arriba (na palestra) unos y abaxo los otros. Tol mundu pue tar nel mesmu andar, compartiendo protagonismu los que falen colos qu’atienden. Aprender y deprender, enseñar o compartir los conocimientos, nun tien por qué ser daqué aburrío. Al revés, pue ser divertío y positivo. Y l’espaciu onde trabayar, comunicar o axuntase nun tien que ser escuru y feu, pue tar enllenu de color.
Circus by Borja G. Finat d’Uviéu entarra pa siempre la idea de salón d’actos con cortinones y silles rancies. Esti espaciu multifuncional pa eventos ta compuestu de dos estancies independientes, una –el teatru– con grada de butaques escalonada, escenariu y pantalla de proyecciones y otra –el foru– con grada circular, escenariu y dellos monitores. L’acústica y l’equipu técnicu tán mui cuidaos en Circus. Por exemplu, nel teatru, un sistema de soníu envolvente con subwoofer de 1500 watios de potencia y un proyector dixital que ta a la última son quién a facer que se vea una presentación como si fuere una película y una película como si se tuviera na sala de cine meyor.
Teatru, cine, audiovisuales, conciertos de música, entregues de premios, conferencies o clases puen programase nesti espaciu que tien una xestión privada. El despachu d’abogaos Ontier son los qu’apostaron por llevantar na capital asturiana un espaciu rompedor y optimista y ponelu a disposición de les empreses, organizaciones y particulares.
Leave a Reply