La edición novena del festival de cine Mediu Güeyu va facese otru añu más nel llugar de Rozaes, nel conceyu de Villaviciosa. Mediu Güeyu ye una de les propuestas más necesaries y prestoses del panorama cultural asturianu, y convierte cada añu l’aldea maliaya nun escenariu emisor de cultura, participación y debate.
El sábadu día 30 van poner la película La tortuga roja, de Michael Dudock, pensada pa que la vea la xente menudo. Entá nun se conocen tolos detalles del programa, pero lo que yá se sabe ye que’l platu fuerte del festival 2019 va ser la emisión d’O que arde, película grabada en gallegu pol director coruñés Oliver Laxe. Esti llargumetraxe yá lleva superaos los 62.500 espectadores y ye la película rodada en gallego más vista de la historia. Esti éxitu demuestra que’l cine independiente y periféricu puede colocase ente les 25 producciones más vistes n’España.
La película, amás, ta acabante llevar el premiu Astor de Oro a la meyor película estranxera y l’Astor de Plata al meyor guion nel Festival Internacional de Cine de Mar de Plata, n’Arxentina. La cinta yá llevara’l Premiu del Xuráu y el Premiu a la Meyor Creación Sonora nel festival de Cannes, Francia.
O que arde cuenta la historia d’Amador, un paisanu que sal de la cárcel después de tar presu por prender fueu al monte. Al llegar pa casa, pa una aldea apartada de Galicia, espérenlu la madre, que ye mui vieyina yá, la perra y les tres vaques que tien la madre. La vida va pasando despacín pero pa los protagonistes (dos actores que nun son profesionales) siempre ta presente l’amenaza del fueu.
Después de poner la película, va facese un debate sobre les quemes y el despoblamientu de les aldees nel que va participar, ente otres persones, Amador Arias, el paisanu protagonista d’O que arde.
Leave a Reply