ALBERTO SUÁREZ
Dende finales del sieglu pasáu hai exemplos d’edificaciones llevantaes namás que con contenedores o con contenedores como complementu, pa servir de vivienda, bloque d’edificios, galería d’arte, terminal de pasaxeros, concesionariu y hasta ponte. Noruega, Holanda, Corea, Alemania, Estaos Uníos o Australia cuenten con obres importantes llevantaes con estos recipientes –fechos con aceru corten– que sirven pa protexer les mercancíes nel tresporte marítimu o terrestre y que tienen unes midíes estándar que permiten apilalos en posiciones diferentes. La incorporación del conceptu de reciclaxe al mundu de l’arquitectura y lo durable y versátil d’estes estructures fexo que s’empezaren a usar n’obres públiques y privaes.
Sergio Baragaño Cachón nació n’Uviéu nel 1975, estudió arquitectura en Les Palmes de Gran Canaria y en Barcelona, rematando la formación en Finlandia, onde s’empapó de la obra del gran arquitectu racionalista Alvar Aalto. Enantes d’empezar a trabayar p’Arcelor dende Valencia, tuvo tamién n’Australia. Anguaño tien l’estudiu abiertu en Madrid.
Les sos obres caracterícense pol usu del aceru galvanizao en volúmenes protagonizaos por paralepípedos, que con frecuencia son reinterpretaciones de los contenedores que s’usen pa tresportar mercancíes nos buques, a escales muncho mayores. Les obresprincipales de Baragaño tienen un denominador común: un plazu d’entrega qu’establez el cliente mui curtiu; esti ye’l motivu pol que suel plantear construcciones industrializaes. Ente los trabayos más destacaos figuren «Tinglados del puerto de Avilés», l’edificiu de la Fundación Metal –tamién n’Avilés–, la terminal de cruceros de Bilbao o la Estación Marítima de Xixón, toos ellos premiaos en dellos certámenes d’arquitectura.
B home
B home ye una vivienda –unifamiliar o colectiva–, oficina o equipamientu públicu modular prefabricaos n’acero galvanizao, madera y fibrocemento, que se tresporta en camiones y s’instala nel solar del futuru usuariu. La edificación compónse d’estructures en forma de paralepípedu, que nes aristes perimetrales lleven vigues d’aceru y nes fachaes o cubiertes lleven paneles machimbraos. Estes viviendes tan diseñaes y pantentaes por Baragaño, produzles Arcelor y tienen un plazu de fabricación de cuatro meses. Los tamaños varíen a gustu del comprador, siendo la superficie mínima de 33 metros cuadraos dividíos en dos estancies (sala-cocina-cuartu y bañu), que tien un preciu de 50.000 euros. L’arquitectu ufierta un catálogu con delles posibilidaes, basando les propuestes en combinaciones d’un habitáculu que fai de salón-cocina, al que s’amesta a otru d’igual tamañu que val pa un cuartu, y que van xuníos gracies a otru cuerpu más pequeñu que da pa un bañu o pa escalera y pasillu. Con combinaciones d’esos módulos ye quién a satisfacer les necesidaes de cualquier veceru.
La construcción cumple tolos requisitos del códigu técnicu de la edificación –normativa que regula les calidaes estructurales de les viviendes nueves, los sitemes d’asilamientu al fríu y al ruíu, la eficiencia enerxética, accesibilidá ensin barreres arquitectóniques, etc–. Con estes construcciones, Bargaño pretende aplicar al mundu de la vivienda técniques vanguardistes que s’usen nel automovilismu o na aeronáutica pa facilitar la movilidá de les cases, el crecimientu futuru –n’horizontal o en vertical–, el poder cumplir con unos plazos d’entrega mui baxos, el trabayar con un presupuestu ciarráu, el disfrutar de versatilidá nel cambiu d’usu de los espacios o el amenorgar les molesties y residuos que xenera la construcción nel entornu onde va la edificación.
B home ye un sistema constructivu responsable pa col mediu ambiente porque los módulos tan fechos con materiales reciclaos y reciclables. La mayoría de les viviendes propuestes nel catálogu del arquitectu tienen les cubiertes planes, lo que permite incorporar les terraces como espaciu habitable, anque tamién tienen contemplao la posibilidá de facer teyaos inclinaos cuando les normatives d’edificación nun permitan les planes.
La fotógrafa Mariela Apollonio, formada en Valencia y que ta especializada en retratar arquitectura, apurre na so páxina web una bona amuesa de semeyes de trabayos de Baragaño arquitectos:
Terminal de cruceros del puertu de Bilbao, País Vascu.
Estación marítima del puertu de Xixón, Asturies.
«Tinglaos» del puertu d’Avilés, Asturies.
Fundación ArcelorMittal n’Avilés, Asturies.
Renovación del Centru R+D d’ArcelorMittal n’Avilés, Asturies.
Leave a Reply