Bulita

ALBERTO SUÁREZ
Los nietos ya las buelas tiénense polo xeneral un querer especial, intensu, inmensu. Esti ía’l casu de Celestina Ca Sanchu y Xosé Antón «Ambás». Al velos xuntos ía imposible saber si quier más la buela al nietu o’l nietu a la buela, porque hai cousas que nun se puedin midir ya una d’ellas ía esa. L’amor nun se midi, vese, ya cántase. Cántase a los nenos p’adormecellos, cántase a los amores pa consiguillos ya pa nun olvidallos. Cántase a los amores que nun puen ser ya a los perdíos. Ya’l qu’ía de cantar pon tol amor na so tonada pa faer más guapa la vida.

Celestina Ca Sanchu, con noventa y cuatro años ta acabante sacar un discu con trece cantares que son sones de danzas, jota, agarraos ya asturianadas. Celestina va un tiempu que, por disgracia, perdió la vista pero, por suerte, conserva una voz fuerte, una memoria de fierro ya’l gusto por entonar bien ya marcar las melodías. Celestina con tanta vida, tanto como vio ya sintió, ía una informante de la nuestra tradición escelente ya con esti discu –el segundu que graba– regálanos unos sones inéditos que nun se pagan con nada ya, de pasu, como cantadora ya como muyer, enséñanos lo guapa que pue ser tamién la vieyera.

Ya que naide s’engañe, Bulita, –el discu nuevu de Celestina– nun ía un homenaxe del nietu nin un caprichu, ía una grabación con piezas de categoría como «Los labradores» o «No subas, paloma, al monte», porque’l rigor col que trabaya Xosé Antón «Ambás» siempre ta presente en tolo qu’entama pa escoer y cumpartir sones guapos ya nuevos, porque lo más importante pa él ía que nun se pierdan. Na presentación de Bulita, n’antoxana de Ca Sanchu, nel llugar de La Pumariega del pueblu d’Ambás, xuntáronse más d’un cientu de personas p’aplaudir a Celestina –que tamién cantó una copla– ya pa danzar a los sones qu’ella-ys enseñó.

Celestina, como tantas outras informantes del Archivu de la Tradición Oral d’Ambás, ía la voz d’outros tiempos nos que nun había más diversión que la que nacía de las gargantas, por eso saben tantos cantares ya por eso quedanon tan bien grabaos nas suas memorias, porque los momentos de felicidá mal s’esqueicen. Las buelas d’Ambás fuenon las primeras fontes de cantares d’un trabayu de recopilación qu’él empezó faer en casa ya que munchos años más tarde, depués d’andar el país enteru, forman la Archivu de Tradición Oral más importante d’Asturies.

Nel 2007, l’Archivu d’Ambás en collaboración col Muséu del Pueblu d’Asturies editanon el discu Celestina Ca Sanchu, con treinta y dos cantares. Bulita ía una edición privada grabada en marzu de 2016 por Toni de Benito, con diseñu de Xel Díaz ya la producción de Xosé Antón «Ambás» ya Ramsés Ilesies.