HENRIQUE G. FACURIELLA
L’actor, autor y director teatral Borja Roces (Sotrondio, 1980) lleva yá un añu y mediu n’Asturies dende que volvió de Madrid. Anque la vuelta foi, nun principiu, pa montar l’espectáculu Romeries Varietés con Factoría Norte –lo que-y diba llevar, en principiu, dos meses–, acabó enllazando con otros trabayos como actor y director, tal como’l proyectu Mucho ha llovido, de Pachi Poncela o País malva, un espectáculu pola igualdá al cargu del Colectivu Muyeres. Roces ye tamién director del Fèstin. Festival Escena Samartín, del que yá se cumplen dos ediciones y que, anguaño, va desenvolvese en Samartín del Rei Aurelio ente los díes 30 de xunu y 3 de xunetu.
¿Qué balance fai de la primer edición del Fèstin?
El balance de la primer edición ye positivu, lo primero, porque se consiguió facer el festival. Amás, tuvo muncha repercusión nos medios tanto xeneralistes como especializaos y nel ámbitu escénicu asturianu, y el públicu foi aumentando de día en día. Prestaríame qu’esti añu’l balance fuere tovía meyor, sobre manera nel aspectu d’atraer a la xente, que la xente vea qu’hai un festival de teatru y danza en Samartín y que s’anime a venir.
¿Cuáles son les novedaes principales d’esti Fèstin en comparanza col anterior?
Hai una novedá fundamental y ye qu’esti añu intentemos qu’hubiera muncha más presencia na cai. Per una parte, hai dos espectáculos de Tras la Puerta Títeres –ún titúlase Cuentos susurrados y l’otru, Aureliotiterías; el primeru ye una especie de cuentacuentos personalizáu, con dos actrices que van pela cai ofreciendo a neños y mayores conta-yos un cuentu al oyíu o recita-yos un poema, unos en castellanu y otros n’asturianu, y con tou esti material, van facer una instalación efímera onde’l públicu escriba dalguna idea sobre lo que-yos acaben de contar; Aureliotiterías mezcla al pintor surrealista Aurelio Suárez con Julio Cortázar, ye un espectáculu de marionetes de papel que se va facer nos quioscos de la música de L’Entregu y en Sotrondio y onde los personaxes tán inspiraos na obra pictórica d’Aurelio Suárez–. La otra actividá ye un espectáculu de circu na cai al cargu de Serabalam Zircus Magic, que se va facer el sábadu 2 de xunetu, a les 20:00 hores, nel Parque de la Llaguna, en L’Entregu.
La otra novedá grande d’esti añu ye qu’hai un espectáculu de poesía, en concretu, de slam. Hai un artista d’equí de Samartín, anque vive en Barcelona, que se llama Dani Orviz y que se dedica a esti xéneru con munchu éxitu en Francia, Bélxica y tamién n’España. El slam ye una poesía que ta a mediu camín ente lo xuglaresco y el monólogu, anque tien tamién un componente de rap y críticu. Ye un espectáculu mui frescu onde la xente participa directamente na creación, pos él va pidiendo al públicu que-y proponga idees o frases sobre les que crear poemes nuevos en directu. L’añu pasáu, la poesía tuvo presente na cai pente medies de los poemes que dellos autores nos cedieron pa imprimir en formatu grande y esti añu quiximos afondar nesta presencia con un espectáculu específicu.
Vamos dar agora un repasu pela programación y les peculiaridaes de cada obra. Empezamos con Viva el pase doble español.
Esti ye un espectáculu d’una compañía de Madrid que se llama Artes Verbénicas, anque ún de los sos integrantes, Pelayo Rocal, ye de Piedrasblancas. Ye una compañía que tien cuatro años d’historia pero que, nesti pocu tiempu, trunfaron yá nel Talent Madrid, un concursu pa compañíes nueves qu’organicen los Teatros del Canal. Los sos espectáculos caracterícense pola so sinvergonzonería y falta de prexuicios y nellos dan una vuelta a tolo castizo y relacionao cola iconografía popular española del sieglu XX. Asina, garren obres mui casposes y pásenles per una peñera más actual, siempre con música, o recreen fiestes populares, onde, por exemplu, Pelayo bailla un pericote sexi. L’espectáculu que train ye un pase doble porque faen dos funciones: una llámase Señora y otra, ¿Cómo me las maravillaría yo?, que s’articulen a partir de frases célebres de Rocío Jurado y Lola Flores sacaes totalmente de contestu. Nun faen de Lola Flores nin de la Jurado, sinón que conviden al públicu a divertise y figurase situaciones mui lloques alredor d’eses frases que, al sacales de la situación onde se xeneraron, tienen un valor añadíu y que pasaron yá a la cultura popular.
Recuerda un poco a los espectáculos de Rodrigo Cuevas.
Sí, tienen esi puntu canalla de Rodrigo, del que son, amás, mui amigos.
¿Qué ye Teatro Invisible?
Ye l’espectáculu de Matarile Teatro, que ye una de les compañíes punteres del teatru de creación nel Estáu. Lleven más de 30 años trabayando y, pa mi, ye un luxu que vengan, pos había años que nun actuaben n’Asturies. Ensin desmerecer a naide, pa mi son la xoya del festival. L’espectáculu que train ye unipersonal, creólu y interprétalu Ana Vallés, que ye la directora de la compañía, y naz d’unos cursos qu’ella organizó na Universidá de Santiago, onde enseñó teatru a estudiantes, y qu’acabaron con una especie de conferencia onde falaba sobre la so esperiencia como autora y directora teatral y sobre la so necesidá, depués de tantos años, de siguir faciendo teatru. L’espectáculu preséntase tamién como una conferencia mui irónica delantre d’un públicu reducíu (pidieron que fueren un máximu de 80 espectadores, pa que pudieren disfrutar de la propuesta escénica) y, pa mi, ye un regalu que vengan a Samartín.
Pasamos a Milwaukee, onde ye responsable de la dramaturxa, la dirección y la interpretación (esto último, xunto a Eugenia García). Nel programa plantéase la pregunta sobre’l ser humanu qu’había primero del monstruu (nesti casu, el Carniceru de Milwaukee). ¿Qué atoparon?
Tamos atopando, sobre too, dolor. Arrespígome enteru porque cuéstame muncho verbalizar lo qu’esti home foi y costónos muncho da-y forma a la obra. Yo quería que fuera un espectáculu de duración curtia y, anque ye fácil que lleguemos a facer una versión mayor, estos 30 minutos constitúin yá una obra completa, non un adelantu. Tres de Jeffrey Dahmer, como tres de cualquier asesín d’estes característiques, hai, sobre manera, una soledá y un dolor brutales. Nel casu de Dahmer hai, amás, una conciencia dende mui mozu de qu’él nun merecía nacer. Esta conciencia tien que xenerar munchu dolor y, nel casu d’él, dende qu’asesina pela primer vez hasta que vuelve facelo ocho años más tarde, hai un tiempu qu’él intenta controlar los sos impulsos, pero, de sópitu, el monstruu que lleva dientro, despierta. Nosotros planteamos una reflexón sobre lo qu’hai detrás de los monstruos de caún y cómo se pue evitar qu’esos monstruos nos coman, dalgo que non siempre resulta fácil.
Nel casu del Carniceru de Milwaukee había una homosexualidá reprimida, como tamién paez que la había nel casu del autor de la matanza d’anguaño n’Orlando, Omar Mateen. ¿Freud sigue teniendo razón en que la represión de los impulsos sexuales xenera neurosis?
Yo creo que sí, anque nel casu d’Orlando pue haber un componente de mímesis d’otros atentaos terroristes que nun existe nel casu de Jeffrey Dahmer. Dahmer naz nun pueblu d’Ohio, anque pasa cuasi tola vida en Milwaukee, onde sí había ambiente gai y onde él tuvo la posibilidá de conocer a dalguién del qu’enamorase y que-y fixera ver la vida d’otra manera, pero la represión, nel casu d’él, foi determinante nel so comportamientu. Anque nun queramos velo, creo que Freud sigue teniendo razón.
Esti añu dase’l premiu del festival a Estrella García y la so compañía, Zig Zag Danza, ¿cuálos son los motivos?
Primero, por xusticia, porque la danza contemporánea ye la gran olvidada de les programaciones, los premios, les subvenciones y hasta del públicu. Estrella García foi la gran pionera de la danza contemporánea n’Asturies, lleva más de venti años col so centru de danza, hai quince monta compañía propia y, hai cinco, abre un espaciu escénicu. Tuvo presencia en tolos programes educativos que se desarrollaron n’Asturies nos últimos años y, por eso, una xeneración entera d’actores debémos-y la enseñanza corporal dende qu’empecemos a formanos. Yera de xusticia reconoce-y l’esfueciu, la valía y la capacidá de resistencia, que tien y qu’espero que siga teniendo hasta que se retire dientro de munchos años. Prestaríame que l’añu qu’entra la danza tuviera tovía más presencia nel Fèstin y qu’ocupara les cais del conceyu, les barriaes mineres, pa que la xente saliera a la ventana y lo viera, porque ye dalgo mui desconocío y que suena mui alloñao pero que, na mio opinión, alimenta l’alma igual que’l teatru o la lliteratura.
¿Qué va contar Zig Zag Danza nel espectáculu que van presentar nel Fèstin?
L’espectáculu llámase Después de cortar el césped. El valor de no hacer ruido y ye’l montaxe col qu’empieza’l trabayu de la compañía. Diez años depués, van reformalu con un planteamientu distintu: ¿qué somos cuando tamos a puntu de dexar de ser? Ye un espectáculu preciosu a nivel estéticu, ellos baillen mui bien y la música de Bach baña tol tiempu l’espectáculu. Ye, ensin dulda, la otra xoya del festival.
¿En que ta trabayando agora Borja Roces?
Agora mesmo toi terminando de preparar Milwaukee y la intención ye facer p’anguaño otru espectáculu mayor, que se va titular El club del desencanto y que va zarrar la triloxía qu’empezó con Pequeño defecto de fábrica y siguió con Encrucijada. Ye una obra onde va haber más actores y una producción más complexa, anque cuento que voi acabar faciéndola, porque siempre faigo teatru anque nun tenga dineru; nun sé cómo m’apaño pero, al final, soi a ello. La intención ye estrenar pa finales d’añu equí n’Asturies, en dalgún de los teatros grandes, ente los que’l Niemeyer diba ser l’ideal. Ye un espectáculu que fala del desencantu vital y del desencantu como sociedá. Van ser cuatro o cinco actores y el testu yá ta adelantáu enforma. Estes cuatro o cinco entidaes teatrales van movese nun espaciu que ta fuera del tiempu, un club sexual onde la xente va, a priori, namás qu’a tener relaciones sexuales, lo que me paez dalgo desolador pero tamién mui guapo, porque nesos sitios, anque la xente vaya buscando sexu, atopa tamién otru tipu de coses y xenérase un diálogu, por exemplu, colos camareros, colos que falen de l’actualidá, de política… Nun dexa de ser un bar onde la xente va a matar el tiempu. Esti espaciu axunta munchos elementos interesantes pa zarrar esta triloxía del desencantu: Pequeño defecto… yera un desencantu del amor, Encrucijada yera un desencantu del arte y esta última, un desencantu de la sociedá y de les persones.
Leave a Reply