Berta Piñán gana’l Xosefa Xovellanos cola novela ‘Como la muda al sol d’una llagartesa’

La escritora Berta Piñán fai doblete na convocatora d’anguaño de los premios lliterarios n’asturianu que convoca la Conseyería d’Educación y Cultura al ganar, amás del Maria Josefa Canellada de lliteratura infantil y xuvenil, el Xosefa Xovellanos de novela. La obra qu’ameritó’l gallardón lleva’l títulu de ‘Como la muda al sol d’una llagartesa’ y d’ella emponderó’l xuráu «la complexidá narrativa d’una historia bien trabada, con munchos personaxes y que caltién l’interés a lo llargo de la llectura».

Esta ye la segunda vez que, de magar se creara en 1980, una muyer gana’l Xosefa Xovellanos, dieciséis años depués de que’l xuráu premiara la novela Güelu Ismail, d’Esther Prieto. Esta vez, la novela ganadora ambiéntase na sociedá asturiana d’anguaño y, sobre manera, nel espaciu rural; nesti escenariu, Piñán asitia’l fechu criminal col qu’emprima la trama de Como la muda al sol d’una llagartesa.

El xuráu d’esta 38.ª edición del premiu Xosefa Xovellanos formáronlu’l director xeneral de Planificación Llingüística y Normalización, Fernando Padilla, como presidente, y los escritores Xulio Arbesú Rodríguez –ganador del añu anterior–, Laura Marcos y Miguel Rojo, amás de l’asesora técnica del Serviciu de Planificación Llingüística y Normalización, Juncal García Velasco, que fixo de secretaria.

Anque más conocida como poeta, Berta Piñán (Cañu, 1963) tien entrao pel camín de la narrativa hai bien d’años y, ente les sos obres publicaes, atópense dos volúmenes de cuentos: La tierra entero (1995) y La maleta al agua (2005), ello por nun falar de la so narrativa destinada al públicu infantil y xuvenil, onde destaquen El branu de Mirtya (2005) o La mio hermana ye una mofeta (2011). Anguaño, los sos llectores, que son munchos, pudieron tastiar un cuentu d’ella na antoloxía Hestories pa contales (Más nomes de muyer), que coordinó Paquita Suárez Coalla.