B for Boy (N de neñu) trata de cómo-yos afecta a la vida de les muyeres nixerianes el choque ente los valores culturales tradicionales y los modernos, y tamién de cómo eses situaciones inxustes les perpetúen otres muyeres que tienen mieu al qué dirán. Esta cinta esplora’l feminismu dende otra visión cultural y xeográfica.
La trama pasa na Nixeria del sieglu XXI, onde una muyer preñada –qu’anda pelos cuarenta– cuida de la fía de siete años de la que lleva un negociu con bien d’éxitu y fai por ser feliz col home y col matrimoniu. Con too y con ello, tien que pasar l’escarniu de la familia, los vecinos y les amistaes por nun ser quién a parir un varón. Cuando, por un albuertu, pierde la criatura que diba tener, va vese obligada a tomar midíes bien complicaes pa mantener viva la esperanza de tener un herederu.
Los trabayos de la directora y guionista Chika Anadu traten el tema de la discriminación de les muyeres y de la presión que la tradición cultural fai contra elles.
B for Boy van dala en Grau, na Casa Cultura, el 16 de payares, a les siete y media de la tarde, en versión orixinal n’inglés colos subtítulos en castellanu, y la entrada ye gratis.
Leave a Reply