Hai’l derechu y el revés. La cara y la cruz. El Yin y el Yang. Tamién, por suerte pa nós, tán los que, por talentu y porque tan convencíos, por méritu y trabayu, demuestren que’l mundu nun avanza en blancu y negru, sinon en munchos colores. António Zambujo ganó un puestu destacáu ente estos arquitectos, negándose siempre, por instintu, creyencies y necesidá artística, a llimitase a un estilu, a una escuela, a un xéneru.
Los cantares d’Antonio Zambujo, defínelos perbien el críticu João Gobern: «son estimulantes y multifacéticos, tan tranquilinos na forma como inquietos nel conteníu». N’últimu discu d’él, Do Avesso, reafírmase por completo esti artista que trabaya n’espacios abiertos, ensin pasos estrenchos y con una comunicación total y natural ente tolos requexos de la casa. Basta con escuchar con calma, por exemplu, les canciones nueves que llevaron al cantante a tirar d’una orquesta, la Sinfonietta de Lisboa, o sentir otres u escoyó tar acompañáu namás con un instrumentu, yá fuera un pianu o una guitarra acústica. Ún de los aspectos más sanos y que más distinguen esti viaxe nuevu, esti discu octavu de la carrera d’él, ye que, cuanto más diversos son los oxetivos que-y interesen, más llinderos quita del estereotipu, del formatu, más acomoda la personalidá musical d’él, que llega muncho más p’allá de la voz (inconfundible) que tien esti home.
El repertoriu d’esti discu últimu refuerza la mano de Zambujo como compositor firmando trés de les melodíes y, con eso, demuestra, de sobra, que la compañía que buscó pa que-y firmaren cantares ye por puru luxu namás. Andecharon con él compositores portugueses y brasileños, amás de la presencia d’un cantar inmortal («Amapola») del español que marchó pa los Estaos Uníos José María Lacalle, y otru cantar del uruguayu Jorge Drexler, el primer músicu de fala hispana que llevó un Óscar de Hollywood.
Na producción del discu hai un tríu que prescinde d’austeridaes pero que nunca escarrila polos escesos: Nuno Rafael, Filipe Melo y João Moreira. Pue ser casualidá, pero’l cantante enfótase en caún de los trés pa una sección d’instrumentos: el primeru ye famosu pol control de les guitarres, el segundu ye pianista distinguíu y el terceru brilla como trompetista. Por si fuera poca cosa, António Zambujo asume otru desafíu más cola participación de la Sinfonietta de Lisboa, dirixida pol director Vasco Pearce de Azevedo. Con toes estes participaciones, amás de les de músicos como Bernardo Couto, Ricardo Cruz, Emilie Flop, José Miguel Conde y Ana Cláudia Serrão, y los soníos particulares d’instrumentos menos comunes, como’l muérganu Hammond, el clavinet, l’Ebow, el regazo acero, la marimba, los clarinetes y el violonchelu, amás del pianu, les guitarres y les percusiones, el discu enteru suena enseñando que nunca hai sobrecarga, serenu y col mandamientu cimeru d’apartar los ringorrangos y cualquier deriva hacia l’exhibicionismu: porque namás lo importante, lo esencial, sigue conduciendo les melodíes, les palabres, la voz, los cantares.
António Zambujo nació en Beja, Alentejo, nel 1975. Tuvo una infancia mui musical –empezó a estudiar clarinete con ocho añinos– y una adolescencia mui inquieta dientro la música qu’acabó por convertise nun oficiu, instaláu yá en Lisboa, ciudá onde gastó’l tiempu a partes cuasi iguales ente’l fadu y los musicales. Estrenóse colos discos nel 2002 y llevó una serie impresionante de premios y otres distinciones, como la Orden del Infante D. Henrique, que-y dio’l presidente de la República Portuguesa nel 2015.
Zambujo tien una tendencia natural –y nun ye estratexa– pa nun escoyer una «forma única» (nin siquiera rápida) nos enfoques musicales. El públicu quierlu y el reconocimientu de les crítiques van medrando, ensin priesa pero col pasu que quier el cantante, que s’entrega completu en conciertos y festivales en Portugal y en cualquier parte (Brasil, Dinamarca, Noruega, Azerbaiyán, Israel o Bulgaria y más tovía). El 7 de febreru del 2020 va tar en conciertu na aldea de Vinhais, nel norte de Portugal, al oeste de Bergancia. Eso ye lo más cerquina que, de momentu, va tocar d’Asturies, a tres hores y media de coche.
Leave a Reply