Ángeles Carbajal (Argüeyes, Siero, 1959) ye una de les poetes imprescindibles de la lliteratura asturiana (en castellanu y n’asturianu). La voz serena de los poemes d’ella, ensin ringorangos nin pedantería, natural y llimpia como l’agua de manantial, tien dao de los meyores versos de les últimes décades. Esi agua que da la vida y que dio nome al pueblu d’Argüeyes que la vio nacer. La voz de Carbajal ye una voz de pueblu tamién, de sitiu onde ta lo esencial namás, los elementos puros del cosmos y que fala’l mesmu idioma en tol universu. Un pueblu, una aldea, onde se siente la fuercia de la naturaleza y la naturaleza de les persones, porque una y otres tán cerca, lleguen dientro.
La escritora presenta’l llibru nuevu con un pensamientu de Lao-Tsé –«Soi imprecisu como la mar, asemeyáu al que nun tien ú agarrase»– y sigue de la siguiente manera: «Y por eso texemos una rede de palabres repartíes pa captar los díes y afanes de la nuestra vida, antes del escaezu. Quedar a solas contién los poemes más acompañaos qu’escribí. Vas encontrar nellos, estimáu llector, intertestualidaes abondes, que son una parte esencial de la esperiencia vital y poética que los fixeron posibles. Al dase cuenta de la soledá más radical, el yo entiende que’l so ser ye un ser como otru cualquiera, sometíu al rigor d’una vida y una muerte que nun ye quién a comprender, y que’l cantu d’él desoláu, desoláu pero cantu a fin de cuentes, nun alza la voz propia ensin les voces de los demás; que tou cantu ye’l de toos igual que de toos ye tamién la soledá».
Ángeles ye llicenciada n’Historia del Arte pola Universidá d’Uviéu. Collaboradora en revistes lliteraries como Anáfora o Clarín, y directora de talleres de llectura y creación lliteraria. Pero ye, más que nada y perenriba de too, poeta. En castellanu tien publicao La caligrafía de la distancia (1993) y La sombra de otros días (2002); y n’asturianu En campu abiertu (2013), premiu «Teodoro Cuesta» de poesía, y L’aire ente la rama (Impronta, 2015) que llevó’l XX premiu «Xuan María Acebal» y la distinción de «Meyor Llibru n’Asturianu» según la Tertulia Malory.
Quedar a solas
Ángeles Carbajal
Impronta, 2019
62 páginas
Leave a Reply