Ambit ye una fonte ensin serifa escéntrica y única inspirada nes grotesques que primero vinieren, pero adaptada pal sieglu XXI. Los detallinos que más llamen l’atención d’ella son les efes y les erres, que tienen versión con más rasgu rizáu, pa los que nun-yos pete muncho, tamién tienen versión recta. Les ces y eses minúscules y mayúscules paez que se curven pa contra elles, lo que da una identidá mui marcada a esta tipografía. Tamién destaquen les patines con vuelta de la erre y la ka mayúscules.
Ambit gasta naá menos que siete grosores del más delgadín al más tochu y caún tien versión cursiva torcidina. La lletra tien, amás, un conxuntu de caracteres estendíos pa que valga pa usala na mayoría de los idiomes qu’usen l’alfabetu llatinu. Les característiques OpenType traen tamién lligadures y una gama completa de númberos de revestimientu y d’estilu antiguu, caún con versiones tabulares.
Pola manera que tien de ser, tan distinguida, Ambit paez perfecta pa diseñar marques comerciales y proyectos editoriales tanto impresos como dixitales. Esta fonte ye obra del estudiu inglés Mashcreative, que ye la marca comercial cola que trabaya el diseñador gráficu y tipógrafu Mark Bloom y ta disponible pa mercala n’esclusiva na fundición dixital CoType Foundry.
Leave a Reply