La Conseyería d’Educación y Cultura del Principáu d’Asturies concedió’l IX Premiu Alfonso Iglesias de Cómic en llingua asturiana a la obra Los llazos coloraos, del artista gráficu Alberto Vázquez García. El xuráu, qu’emitió’l so veredictu por unanimidá, destacó nel acta «la gran ellaboración del guión y el trabayu exhaustivu d’investigación, que constrúin un retratu fiel de la posguerra n’Asturies». El trabayu céntrase na vida de Constantina Pérez ‘Tina’, una lluchadora antifranquista que morrió al finales del añu 1965 depués de penar de cárcel en cárcel ensin cuidaos médicos.
El xuráu encargáu de valorar les obres presentaes al certame, dotáu con 3.000 euros, aconceyó baxo la presidencia del director xeneral de Planificación Llingüística y Normalización, Fernando Padilla, y formáronlu l’artista plásticu y fotógrafu Luis García Iglesias; Luis Navazo, ganador de la edición anterior; Carolina González Rodríguez, autora de cómics, y José Antonio García Fernández, xefe del Serviciu de Planificación Llingüística y Normalización, en calidá de secretariu.
Alberto Vázquez ye un artista gráficu con una trayectoria profesional bien estensa, onde rescamplen los sos trabayos como dibuxante pal diariu La Nueva España y la publicación dixital asturnews.com, o los murales, cómics y cartelería que fixo pa delles organizaciones como Soldepaz-Pachakuti, Médicos Mundi o Secretariáu Xitanu, ente otres. La memoria de la llucha obrera y antifascista ye’l tema tamién de dellos trabayos documentales de los que ye autor, como 34-35, diez asturianos nel exiliu francés o Poca ropa, la llucha contra la dictadura franquista en Mieres.
Leave a Reply