Familia con Autorretratu al fondu ye’l títulu del últimu poemariu d’Aida Escudero. Facer por quedase con esti nome y esti títulu na cabeza ye un gran regalu que’l llector o llectora puede facer pa sí. Porque tamos falando d’una gran escritora y d’un gran llibru. Un llibru d’esos pocos a los que presta volver, con una poesía cercana, midida, cuidada y, sobre too, natural, como la vida. Cuando una escritora ye capaz de crear un poema como «Paragües» («L’amor yera eso: /convivencia y tiranía») ye facil dase cuenta de la intelixencia y nivel de depuración qu’hai detrás del trabayu d’ella.
Aida Escudero (Uviéu, 1985) ye maestra de llingua y lliteratura española y asturiana. En 2017 estrenóse con Esti llugar qu’agora ye nuesu: poemariu neanderthal que llevó’l premiu de poesía Fernán Coronas. Y de premiu en premiu, porque Familia con Autorretratu al fondu llevo l’Asturies Xoven de Poesía tamién nel 2017. Menudu doblete. Na carrera del oficiu d’escribir ye fundamental qu’haya premios lliterarios porque al que los lleva permíten-y algamar reconocimientu, fama y sacar unes perres coles que poder siguir dedicándose a crear. Porque los creadores nun viven del aire y la cultura nun ye daqué de primer necesidá no que la masa invierta tolos díes.
Facer camín, ganar un güecu nes lliberíes y nos medios de comunicación ye perdifícil. Llegar al público yelo más tovía. Anque la obra sía perbona, como ye’l casu d’esta última d’Aida. Ye una pena que nun lleguen a tol mundu poemes de la guapura y talla de «Pasu de Xigante» («Siento que güei / la vida tien un güeyu / puestu enriba mi. / Mírame de llau, / col procuru d’una ma / nos primeros pasos. / Esi ximielgase p’avanzar / como faen les gotes / nos teyaos, / enantes de tomar la decisión / de dir escontra’l suelu. / Asina, con pasu temblorosu, / ye como caleyo / pelos díes, como si too fuera nuevo / o como si llevara zapatos / ortopédicos, / por más qu’al mio llau / p(a/i)sen dalgunos / con pasu xigante»).
Familia con Autorretratu al fondu
Aida Escudero
Impronta, 2018
Leave a Reply