Aheneah ye Ana Martins (Vila Franca de Xira, 1996) una artista y diseñadora gráfica portuguesa que compaxinó les enseñances del sistema educativu nel mundu del diseñu coles de la güela nos llabores de texer, coser y bordar. Y d’esa mezcolanza nació un trabayu artesanu qu’usa lo manual y lo dixital, que pelea con filos y con píxeles. La intención d’Aheneah ye sacar del contestu los llabores manuales tradicionales y llevalos al llinguaxe gráficu d’agora, modernu, de la que conecta manifestaciones culturales d’époques diferentes y xeneraciones de persones tamién diferentes.
Nel Festival d’Arte Urbanu con Llana de Covilhã –ciudá de la Serra da Estrela fundamental na historia de Portugal pola cantidá de fábriques de filar llana y de texíos qu’hubo–, Aheneah presentó la obra que se llama, Matriz (2018), y que ye l’homenaxe d’ella a les güeles. La manera de facela foi espetando setecientes puntes y enroscando quilo y mediu de llana pa xenerar una imaxe d’una güelina texendo con un efectu tipo puntu cruz.
Ana Martins nació y medró en Vila Franca de Xira, una ciudá pequeñina de cerca Lisboa. Tolos díes diba y venía de casa pa la escuela viendo los paredones de les cais y pensando no d’ella. Esti 2018, nún d’aquellos paredones colgó una obra que lleva 2.300 torniellos y 700 metros de filo.
Aheneah tamién trabaya pa empreses, como pal bar d’Oporto Plano B, –un sitiu que cuida muncho la imaxe y que cada mes estrena conteníos artísticos visuales–. Nesta ocasión la creadora cosió una b a mano y vio clara la necesidá de que baillara. Pa esi procesu de convertir un trabayu manual nuna animación en tres dimensiones necesitó que l’ayudara Monk. Xuntos fueron quien a facer una animación analóxica percomplicada. Necesitaron 135 fotogrames cosíos a mano cola letra b con ocho estilos diferentes. Pa completar, fixo tamién un mural grandísmu pal bar colos mesmos modelos de lletra qu’usaren na animación.
Leave a Reply