Jerry Springle ye una cantante y escritora ucraniana. Participó nun concursu de talentos de la televisión y, de cuatro años p’acá, anda per Europa tocando l’ukelele y cantando, unes veces n’escenarios grandes y otres n’espacios pequeñinos. Les lletres d’ella son facilines pero la belleza ta en como-yos pon voz. La manera dulcina y a la vez resuelta de cantar que tien esta rapaza dexa almirada a muncha xente que la van escuchar nos conciertos.
El 14 d’avientu, a les once la nueche, va tar tocando nel café Toma 3 de Xixón. Nel conciertu nun van faltar composiciones que falen del sentimientu de vese perdíu y de la necesidá de topar el sitiu de caún nesti mundu, o cantares a la amistá y a lo muncho que nos cuesta, munches veces, pidir perdón.
Jerry Springle, ye’l nome artísticu d’Oksana Semchenkova, una viaxera tremenda que se graduó na escuela de música y que tuvo aprendiendo a tocar el pianu diez años. Pero como ye un alma que nun da parada ye más fácil pa ella carretar l’ukelele –un instrumentu que-y gusta más que la guitarra– . Tien un discu nuevu, que sacó esti 2018, y ta promocionándolu per tola península Ibérica. ¿Y cómo empezó a movese per Europa? P’agospiase usó les redes sociales y queda en casa d’amigos o de persones qu’acaba conociendo y que-yos presta tenela en casa como una manera d’intercambiar esperiencies culturales. Lo que se conoz n’inglés como’l couchsurfing.
Leave a Reply