Xose Lois Romero, Angus Lyon y Marcos García son tres de los músicos y compositores más importantes del acordión nes tierres d’ellos –Galicia, Escocia y Asturies–. Caún toca ún de los tres tipos d’esti instrumentu más conocíos nel mundu y, al xuntase y tocar, entamen una conversa ente ellos nun idioma únicu y en llenu de matices y acentos diferentes. Nesta propuesta internacional, ponen tola creatividá y esperiencia d’ellos pa facer furrular un proyectu inéditu nel que, pela primer vez, tipos d’acordiones diferentes xeneren un discursu musical inimitable dafechu.
La variedá de recursos qu’amesten van dende’l soníu más orgánicu al tratamientu sonoru de vanguardia del instrumentu gracies a la tecnoloxía musical. AccordTrio son quien a combinar una variedá d’estilos nunca fecha hasta agora pa crear una esperiencia mui espresiva.
Esti tríu, amás de con conciertos –van tocar en Xixón el 5 d’avientu nel Antiguu Institutu, y también en delles ciudaes gallegues– preséntense nos escenarios con un primer discu de composiciones orixinales debaxo’l brazu. El trabayu d’estudiu, que yá se viende per internet, grabóse n’Escocia ente xunetu y agostu d’esti añu 2018 nel Gran’s House Studio de Biggar y lleva nueve cantares instrumentales.
Conciertu d’AccordTrio
Antiguu Institutu Xovellanos, Xixón
5 d’avientu de 2018
Leave a Reply